У першыя тры стагоддзі Хрысціянская Царква толькі часткова пранікала за межы Рымскай
імперыі; барацьба з рымскім язычніцтвам за сваё існаванне прымушала хрысціянскае грамадзтва
збіраць усе свае сілы ў адным месцы, менавіта ў Рымскай імперыі. Але, калі барацьба
скончылася падзеннем язычніцтва і Рымская імперыя зрабілася хрысціянскай дзяржавай,
Царква атрымала магчымасць выступіць за межы імперыі. Вельмі рознымі былі шляхі, якімі
Хрысціянства пранікала ў язычніцкія краіны. Хрысціянскія купцы па гандлёвых справах
наведвалі язычніцкія краіны і заносілі туды сваю веру; хрысціяне, якія траплялі ў
палон да язычнікаў, але адукавалі іх святлом Евангелля; язычнікі, якія траплялі ў
палон да хрысціян, знаёміліся з Хрысціянствам і, вяртаючыся на радзіму, часта распаўсюджвалі
яго сярод сваіх суайчыннікаў. Былі яшчэ і манахі-падзвіжнікі, якія сяліліся ў
пустынях на межах Рымскай імперыі, або нават у язычніцкіх краінах, і сваім святым
жыццём абуджалі ў язычніках павагу да Хрысціянства і прымушалі прыймаць яго. Акрамя
манахаў былі і прапаведнікі Евангелля. Яны з апостальскай бясстрашнасцю ішлі ў няведамыя
мясціны, як тады казалі “у краіны варвараў” і засноўвалі там Цэрквы. У самой імперыі
главы Цэркваў і манархі засноўвалі місіі для навяртання язычнікаў. Хрысціянства ішло
і праз дынастычныя шлюбы, калі прынцэсы-хрысціянкі выходзілі замуж за язычніцкіх каралёў,
або князёў, тыя таксама часта станавіліся хрысціянамі, а потым і іх падданыя. Тыкім
чынам, у другі перыяд Царква распаўсюдзілася па многіх язычніцкіх краінах Афрыкі,
Азіі і асабліва Еўропы. У Афрыцы першымі прынялі Хрысціянства абісінцы або эфіопы.
Апосталам Эфіопіі быў Святы Фруменцій. Каля 340-га года, яшчэ ў юнацкім узросце, ён
разам са сваім дзядзькам Меропіям і братам Эдэсіям, вандравалі на караблі і прысталі
да берага Абісініі. Мясцовыя жыхары забілі мараплаўцаў, акрамя двух братоў. Іх прывезлі
да цара Чагема, які, убачыўшы іх адукаванасць, аднаго прызначыў казначэям, а другога
пісьмаводцай. Прыблізна ў 342-м годзе, пасля смерці цара, яго ўдава папрасіла братоў
займацца справамі кіравання той краіны, пакуль яе сын не дасягне паўналецця. Калі
ж той стаў дарослым, ён адпусціў іх. Эдэсій стаў святаром, а Фруменцій, калі прыехаў
у Александрыю, пазнаёміў Патрыярха Афанасія са станам спраў у Абісініі. Патрыярх,
пасля адпаведнай падрыхтоўкі, высвяціў Фруменція на біскупа. У Абісінію той ужо вярнуўся
з некалькімі святарамі. У хуткім часе ён навярнуў у Хрысціянства дзвух сыноў цара
Чагема, якія валадарылі разам і распаўсюдзіў веру сярод тубыльцаў. Святы Фруменцій
паклаў пачатак перакладу Святога Пісьма і багаслужбовых кніг на абісінскую мову. Жыхары
Каўказа прынялі Хрысціянства часткова в ІV-м, часткова ў VІ стагоддзі. Так, напрыклад,
у Іверыі, на зямлі сучаснай Грузіі, мясцовыя жыхары, іверы, пакланяліся агню і шанавалі
дввух багоў. Аднойчы да іх у палон трапіла хрысціянка Ніна, верагодна манашка, якая
паходзіла з Грэцыі. Па яе малітвах вылечалася дзіця а потым і царыца Іверыі. Сам цар,
аднойчы заблукаўшы ў лесе, памаліўся хрысціянскаму Богу і паабяцаў пабудаваць храм,
калі паспяхова трапіць дамоў. Сваё абяцанне ён пачаў выконваць і адначасова, па парадзе
Святой Ніны, адправіў пасольства да імператара Візантыі Канстанціна з просьбай аб
пасланні ў Іверыю, сёняшнюю Грузію, біскупа і духавенства. Просьба была выканана,
а цар і царыца Іверыі рабілі ўсё дзеля навяртання сваіх падданых у Хрысціянства. У
457-м годзе Канстанцінопальскі Патрыярх Анатолій прызначыў арцыбіскупам у Грузію грэка
Пятра, даўшы яму тытул каталікоса ўсёй Іверыі. Ад івераў Хрысціянства паступова
распаўсюдзілася паміж іншымі плямёнамі Каўказа. Так, у 520-м годзе цар лазаў і цанаў
Цат, прыбыў у Канстанцінопаль і звярнуўся да імператара Юстына І-га з просьбай аб
хросце. Хутка і яго народы прынялі веру Хрыстову. У 541-м годзе Візантыйскі імператар
Юстыніян Вялікі паслаў святароў да язычнікаў-абхазаў, і ў Пітыунце (цяпер гэта горад
Піцунда), была зацьверджана біскупская катэдра. Апосталам Арменіі быў Грыгорый,
якога за прапаведніцкую дзейнасць называлі асветнікам. Ён быў грэкам і паходзіў са
знакамітай сям’і, якая была роднай сем’ям цароў Персіі ды Арменіі. Спрэчкі і войны
вымусілі яго прыехаць у Кападокію, дзе ён стаў хрысціянінам і ажаніўся. Але жонка
памярла і Грыгорый, вярнуўшыся ў Арменію, паступіў на службу да цара Тырыдата. У хуткім
часе, за спавяданне Хрыста, Грыгорыя пачалі пераследваць а потым, па загадзе цара,
яго кінулі ў глыбокі і нячысты роў з пачварамі і змеямі. Там ён правёў 14 гадоў, карміла
яго нейкая ўдава. Адтуль яго дасталі, калі лютасць цара Тырыдата ўжо стала вар’яцтвам.
Святы Грыгорый ацаліў цара і навучыў яго хрысціянскай веры. Атрымаўшы сан святара
ад біскупа Кесарыі Лявонція, ён ахрысціў не толькі армянаў, але і мноства суседніх
плямёнаў. Перад сваёй канчынай Святы Георгій выдаліўся на маўчанне ў пустыню, пакінуўшы
спадкаемцай свайго сына, вядомага ў царкоўнай гісторыі Святога Арастана. Справу Святога
Грыгорыя завершыў адзін з яго патомкаў Ісак Вялікі, які заснаваў мноства цэркваў,
манастыроў і народных школаў. Ён жа падрыхтаваў цэлае пакаленне святароў і паклаў
пачатак армянскай багаслоўскай літаратуры. Пад час барацьбы Хрысціянскай Царквы з
ерасямі ў ІV-м і першай палове V-га стагоддзя Армянская Царква заставалася вернай
агульнай хрысціянскай навуке. Але ў другой палове V-га стагоддзя яна аддзялілася з
прычыны прыняцця монафізіцтва.