The Economist: Shqipëria, një përrallë me korrupsion e prerje të energjisë
(17.08.2007 RV)E përjavshmja prestigjoze londineze “The Economist” merret edhe
me Shqipërinë. Në numrin e kësaj jave, ka një artikull mbi punët që e presin presidentin
e ri shqiptar, Bamir Topi, me titullin domethënës “As pushtet, as lavdi” dhe nëntitullin
“një përrallë me korrupsion dhe prerje energjie”. Detyrat që ka përpara presidenti
i Shqipërisë, vë në dukje gazeta, janë më të mëdha se pushteti që i takon. Detyra
e tij e parë është të gjejë një person të përshtatshëm për të zëvendësuar kryeprokurorin
aktual, Theodhori Sollakun, duke ndryshuar ndërkaq Kushtetutën, e cila nuk jep afat
për detyrën. Nga ana tjetër, ai u zgjodh me një marrëveshje ndërmjet krerëve historikë
të politikës shqiptare, Sali Berishës e Fatos Nanos, por ekzistenca e këtyre në pushtet
– thekson “The Economist” – është një nga arësyet që e bën Shqipërinë të vuajë akoma
nga papunësia dhe investimet e pakta. Politika berishiane “Shqipëria një euro”, që
u premton qira të vogla investuesve të huaj, ka pak gjasa të ketë sukses - vazhdon
analiza – pasi mungesa e energjisë elektrike i largon afaristët.