Më 18 gusht Kisha perkujton Martirët e Ulpianës:ShënFlorin e Laurin
(17.08.2007 RV)Tradita dymijëvjeçare
e krishterimit në trevat shqiptare, nuk mund të mos i falte banorëve të këtyre trevave
në shekuj edhe shenjtorë vendas, ose ungjillëzues të trevave ku banojnë sot shqiptarët.
Dy prej tyre Kisha universale do t’i kremtojë nesër: janë Shën Flori e Shën Lauri. Për
t’i njohur më mirë figurat e tyre po kujtojmë: Sikurse dëshmohet prej burimeve
kishtare, Dyrrah-u pati qysh në vitin 56 një ipeshkëv të shuguruar. Në kohën
kur Shën Pali shkelte në Durrës, atje nisi shërbimin një ipeshkëv me emrin Cesar,
i cili qe një nga martirët e parë të fesë së Krishtit, pra një nga shenjtorët më të
hershëm të krishterimit. I dyti ndër shenjtorët e botës iliro-shqiptare është shën
Ashti (apo shën Asti), gjithashtu ipeshkëv i Durrësit, i martirizuar në vitin 117.
Shën Jeronimi (Hieronymus), një nga katër dijetarët e mëdhenj të kishës, që në
shekullin e 4-t përktheu " Vulgatë-n", duke i dhënë Perëndimit të parin tekst të shkrimit
të shenjtë në latinisht, ishte nga Stridoni i Dalmacisë, vend i banuar nga ilirët,
gjë që e pohon vetë Shenjti në shkrimet e tij. Pak a shumë në të njëjtën kohë,
shën Niketa, i njohur edhe me emrin "shën Niketa i Dardanisë" apo "shën Niketa i Remessiana-s"
(tek sllavët: "sveti Nikita"), kompozoi himnoren e mirënjohur "Te deum, laudeamus"
- "Ty Zot të lavdërojmë". Të paktën që nga fillimi i shekullit të kaluar, kur britaniku
A. E. Burn botoi në Cambridge (1905) monografinë "Niceta of Remessiana", dihet botërisht
se ky shenjtor doli prej botës iliro-shqiptare. Vetë shën Niketa shkruan me dorën
e tij: "Dardanus sum" - jam dardan. Shenjtorë e martirë të tjerë pasuruan traditën
e krishtërimit në Shqipëri duke ardhur prej visesh ku, për shkak të persekutimeve
të jashtzakonshme, nuk patën mundësi të përhapnin Ungjillin e Krishtit. Flori
dhe Lauri, ose Floriani dhe Laurini, siç njihen shpesh dy vëllezërit binjakë, erdhën
nga vise të largëta në shekullin e 2-të në Dardani, ku, me pëlqimin e sundimtarëve
vendës, ngritën një kishë të krishterë, të cilën ia kushtuan Jezu Krishtit. Jetuan
në gjysmën e parë të shekullit të 2-të dhe, kur persekutimi u shtri edhe në trevat
ilire, u martirizuan në Kosovën e sotme, afër Prishtinës, duke mbrujtur kështu tokën
e të parëve tanë me gjak të derdhur për të dëshmuar Krishtin. Në fillimin e shekullit
të pestë, sipas dëshmive të Atë Zef Valentinit (1929), shën Gjon Gojarti kaloi dy
vite të vështira në brendësi të Ballkanit, saktësisht në tokën ilire. Një dëshmi e
paraqitur një shekull më parë nga greko-shqipari Nikolaos Mystakidis bën të ditur
se kishës së Labovës perandori Justinian i dhuroi një copë nga druri i shenjtë i kryqit
të kryqëzimit të Krishtit dhe një dorëshkrim të artë të shën Gjon Gojartit. Tradita
e takimit të hapësirës shqiptare vazhdoi me shekuj. Në veri shën Sergji e Baku; në
jug shën Gjon Vladimiri, deri tek shën Kozmai, tregojnë se bota shqiptare jo vetëm
nuk ishte e largët për misionarët e shenjtë, por, madje, u krijonte atyre mjedise
zhvillimi e lartësimi. Kjo nuk lidhet vetëm me krishtërimin, por me bashkësinë shqiptare
në tërësi. Për ilustrim po lexojmë të plotë letrën e Ali pashë Tepelenës drejtuar
të bindurve të tij, me porosinë për ringritjen dhe ruajtjen e manastirit të shën Kozmait: "Juve
rum të nahijes së Beratit, myzeqarë dhe vlleh grabovarë, katunde dhe çifliqe. Ju lajmëroj
se ja ku vura një epitrop që të më ndreqë manastirin e plakut Kozma; ndihmova dhe
unë me aspra e të ndihmoni dhe ju si t'ju thotë dhespoti, me qëllim që të ndreqet
ky manastir. Për ata që nuk do të japin ndihmën e tyre, do të më mbetet hatëri dhe
pastaj do të paguajnë dyfish. Sikundër ju urdhëroj ashtu të bëni pas këtij vendimi.
(Në Gjirokastër, më 12 shtator 1813" ("Kodikët e Shqipërisë", bot. i DPA & Unesco-s,
Tiranë 2003, f. 48)Dijetari austriak, Teodor Ippen shkruan se në malet e Shqipërisë
së Veriut dikur shiheshin portrete shenjtorësh të kohës së paleokrishtërimit. Kjo
nuk është provuar dhe as mohuar nga ndonjë studiues i mëvonshëm. Por në një përmendore
tjetër të kulturës tradicionale, në të drejtën etnozakonore shqiptare, thuhet rreptë
se "shtëpia e shqiptarit është e Zotit, e mikut dhe e shtegtarit", shprehje kjo e
mirënjohur për të gjithë, por, për fat të keq pa shtojcën: "Kujdes, sepse nuk dihet
kush troket: shenjti a përderësi".