Emisionin XV i ciklit radiofonik “Me Nënë Terezën”, bazuar tek libri ‘Jeta ime’
(17.8.2007 RV)Në emisionin XV të ciklit
tonë radiofonik “Me Nënë Terezën”, bazuar tek libri ‘Jeta ime’, sot e Lumja Terezë
na tregon legjendën simbolike të gushëkuqit të vogël, me sytë e të cilit na mëson
ta shikojmë Kryqin, që nuk duhet ta harrojmë kurrë, sepse është vend hiri; e pastaj
na tregon edhe si vendosi të zgjidhte sarin e bardhë me vija blu, që tashmë është
bërë i njohur në mbarë botën, si dhe pjesët tjera të veshjes së motrave të bamirësisë,
që të gjitha me kuptim simbolik: Gushëkuqi i vogël: Nuk kemi asnjë arsye të
shqetësohemi, të humbasim guximin ose të ndjehemi të mjera, sepse gjithçka bëjmë,
e bëjmë për Krishtin. Është ai që na thërret, Ai që thotë: “Pata uri e më dhatë
të ha… !”. E di se në botë ka miliona e miliona të varfër, por unë mendoj për ta
një për një. Jezusi ishte një. E unë kujtoj fjalën e Jezusit. Ai tha: “Ma keni
bërë mua…!”. Unë, Motrat e Vëllezërit e mi kujdesemi për çdo njeri, si të shikonim
në të Jezusin. E gjithçka duhet ta bëjmë më mirë se ata që janë në botë, me qenë
se e bëjmë për Jezu Krishtin. Në se do të na duket tepër e vështirë, duhet t’i
kërkojmë Jezusit një pikë nga Gjaku i tij i paçmuar. A e keni dëgjuar ndonjëherë
legjendën e gushëkuqit të vogël? Shikonte Jezusin në kryq, shikonte edhe gjembat. Nisi
të sillej rrotull e rrotull, derisa e gjeti mënyrën t’ia hiqte një gjemb, e në përpjekjen
për ta hequr, u ther. Secila nga ne duhet të jetë si zogu i vogël. Gushëkuqi
i vogël nuk e pati të lehtë ta shkulte ferrën: iu desh të mundohej e të shpohej. Nuk
duhet ta harrojmë kurrë Kryqin. Është vend i hirit. Kur vendosa ta bëj apostullimin
tim ndërmjet të varfërve, mendova se një nga format më të frytshme e më bindëse për
t’u pranuar prej tyre, mund të ishte veshja. Vendosa, prandaj, të vishesha si ata. Në
Indi sari që veshim ne, është si ai i të varfërve, ose i ngjet shumë. E vetmja
gjë që ndryshon në të, është kryqi i vogël, i varur në supin tonë të majtë në lartësinë
e zemrës, për kujtim të vuajtjeve të Krishtit. Vendosëm kështu të visheshim me
sarin e grave indiane. I shtuam shiritat blu, simbol i kryeultësisë së Marisë.
Kryqi prej druri në anën e majtë të kraharorit, simbolizon dashurinë tonë për
Krishtin. Sandalet që mbathim në këmbë, simbolizojnë rrugën tonë, të zgjedhur me
vullnet krejtësisht të lirë.