Beogradi kërkon kthimin e policëve serbë në Kosovë
(17.08.2007 RV)Ndërsa administrata e UNMIK-ut në Kosovë jep urdhër për organizimin
e zgjedhjeve të reja, që do të mbahen në një datë akoma të pacaktuar, Beogradi kërkon
kthimin e njëmijë ushtarëve e policëve nga Serbia. Aleksandër Simiç, një nga zëdhënësit
e kryeministrit Vojisllav Koshtunica ka deklaruar se “ka ardhur koha për kthimin e
personelit të ruajtjes së rendit” në Kosovë. Ky kthim parashikohet në rezolutën 1244
të Këshillit të Sigurimit të OKB-së, por nuk është lejuar nga administrata ndërkombëtare,
e cila mendon se kjo do të shkaktonte probleme me shqiptarët. Ndërkaq, peshkopi
ortodoks serb Artemije ka deklaruar se Kosovës duhet t’i jepet vetëm një autonomi
brenda Serbisë, ndërsa kryeministri i Kosovës Çeku ka folur për shpalljen e pavarësisë
pas 10 dhjetorit, data e dorëzimit të rezultateve të negociatave për statusin në Këshillin
e Sigurimit.