(16.08.2007 RV)Forcat e koalicionit të udhëhequra nga SHBA-të vazhdojnë edhe
sot ofensivën kundër talebanëve të fshehur në shpellat e maleve Tora Bora në Afganistan.
Deri tani nuk është bërë publik asnjë bilanc, por amerikanët kanë sqaruar se janë
shmagur viktimat apo plagosjet e civilëve. Talebanët kanë njoftuar ndërkaq, se
së shpejti do të fillojnë bisedimet për lirimin e 19 pengjeve koreanojugore. Si kusht
mbetet gjithnjë lirimi i militantëve të burgosur në Afganistan. SHBA mbështesin idenë
e fillimit të dialogut me talebanët e moderuar, ashtu siç vendosi kuvendi i paqes
mbajtur javën e kaluar në Kabul.
Izraeli dhe SHBA-të kanë nënshkruar
sot në Jeruzalem një marrëveshje mbi pakon e ndihmave për mbrojtjen, me vlerë 30 miliard
dollarë, që do të marrë gjatë dhjetë viteve të ardhshme shteti hebraik. Njëkohësisht
me këto ndihma, Uashingtoni do të ndihmojë edhe Arabinë Saudite dhe vendet e tjera
të Gjirit Persik me rreth 20 miliard dollarë.