(13.08.2007 RV)Uji i pijshëm nuk
është vetëm problem i shqiptarëve, që tradicionalisht kanë ujë, por nuk kanë një rrjet
efikas për shpërndarjen e tij. “Një impenjim më i madh i qeverivë për të luftuar mungesën
e burimeve ujore”: kjo është sfida që propozon “Java botërore e ujit”, e cila u hap
sot në Stokholm. Nisma promovohet nga Instituti ndërkombëtar i Ujit, i cili ka mbledhur
ekspertë e përgjegjës të Kombeve të Bashkuara, të qeverive e të shoqatave bamirëse,
që deri më 18 gusht, do të diskutojnë mbi ndryshimet e klimës, administrimin e burimeve
ujore dhe mungesën e ujit, nga e cila vuan rreth 20% e popullsisë së botës. Rozario
Lembo, sekretar italian për kontratën botërore të ujit, shpjegon në mikrofonin tonë
se cilat janë objektivat e Bashkësisë Ndërkombëtare në këtë fushë: Mundësia
për të marrë pjesë në ndarjen e kësaj pasurie duhet të barazohet me një të drejtë
themelore të patjetërsueshme. Askush nuk mund ta zotërojë ujin e të thotë “është pasuri
personale dhe bëj me të si dua unë”. Fatkeqësisht, duhet të konstatojmë se edhe në
kuadrin e rregullave e të detyrimeve botërore që kemi vendosur, nuk ekziston për shembull,
një agjensi botërore për ujin, e cila të mund të krijojë rregulla, të vendosë dënimet
për ata që ndotin lumenjtë apo që i presin rrugën ujit, duke mos i lejuar kështu ata
që ndodhen poshtë digës të kenë ujë. Praktikisht, njohja e kësaj të drejte njerëzore
është edhe një deklaratë themelore e të drejtave të njeriut. Këto janë dy objektiva
të rëndësishme që duhet t’ia imponojë vetes bashkësia ndërkombëtare.
Nga
Afganistani mbërrijnë lajme për ndeshje të reja të përgjakshme, por edhe lajme të
tjera të rëndësishme. U liruan dy nga 23 pengjet koreanojugore, të rrëmbyera më 19
korrik. Dy gratë i janë dorëzuar Kryqit të Kuq. Ndërkaq, zonat jugore të vendit
janë sërish teatër konflikti. Së paku 14 vetë kanë gjetur vdekjen pas sulmit të talebanëve
kundër një komande të policisë. Nesër, presidenti i Afganistanit, Hamid Karzai do
të takohet me presidentin iranian Mahmud Ahmadinexhad, në vizitën e tij të parë në
Kabul.