(13.08.2007 RV)Rruga e negociatave të reja për statusin e Kosovës sapo ka filluar
dhe menjëherë bëhet i mundshëm një nga versionet më të papëlqyeshme për Prishtinën.
Gjermani Volfgang Ishinger, përfaqësuesi i Bashkimit Evropian në Trojkën që vizitoi
këto ditë si Beogradin, ashtu edhe Prishtinën, deklaroi se “ndarja e Kosovës është
e mundur nëse palët bien dakord për këtë”. Formalisht, të dyja palët janë shprehur
kundër këtij varianti, por sipas vëzhguesve, Serbia po punon për këtë nën rrogoz.
Perëndimin e frikëson një përgjigje e ashpër e kosovarëve ndaj një ndarjeje të mundshme,
që do të kalonte në Mitrovicë, duke respektuar, sipas idesë së propozuesve, kufijtë
etnikë. Mund të ngrihen me armë në dorë jo vetëm shqiptarët e Kosovës, por edhe ata
të Maqedonisë. Ishinger la të kuptojë se as Kosova, as Serbia nuk mund të synojnë
për integrim në Bashkimin Evropian, nëse nuk gjejnë një kompromis të pranueshëm.