Ati i Shenjtë emëron kardinalin Bertone Legat Papnor për kremtimet përfundimtare me
rastin e 90-vjetorit të dukjeve në Fatima.
(11.08.2007 RV)Kremtimet do të mbahen më 12 e 13 tetorin e ardhshëm, pikërisht
90-vjet pasi Zoja e Bekuar iu duk për herë të fundit tre barinjve të vegjël portugezë,
Luçisë, Gjaçintës e Françeskos. Në këtë ditë, mijëra njerëz, që besojnë e që nuk besojnë,
do të jenë të pranishëm në përkujtimin që njihet me emrin ‘mrekullia e diellit’. Kremtimi
u kujton të gjithëve ngjarjen që ndodhi 90 vjet më parë. Në çastin kur turma dyndej
për të parë me sytë e vet mrekullinë e dukjeve, dielli nisi papritmas të luhatej,
duke shkaktuar habi të madhe ndërmjet të pranishëmve. Ishte një shenjë e Zojës së
Bekuar, që të gjithë t’i besonin ftesës së saj për t’u penduar e për të mos mëkatuar
më.