Përsëriteni premtimin që i keni bërë Krishtit për ta çuar Ungjillin në të katër anët
e botës: mesazh i Benediktit XVI, Kalorësve të Kolombos.
(09.08.2007 RV)“Vijoni t’ia kushtoni
energjitë tuaja e zellin tuaj apostolik promovimit të misionit të Kishës, për t’iu
përgjigjur kështu shpresave e dëshirave të njerëzimit, kudo që të jeni”- për këtë
i nxit Benedikti XVI Kalorësit e Kolombos në mesazhin drejtuar Takimit të 125-të të
Urdhërit, që vijon në Neshvil të Tenesi-së. Mesazhin e lexoi para delegatëve kardinali
Tarçizio Bertone, që merr pjesë në këtë takim të madh, në sa viziton për herë të parë
SHBA si sekretar i Shtetit të Vatikanit. Papa i fton Kalorësit t’i përsërisin premtimet
e bëra para Jezu Krishtit, duke marrë shtytje nga tema e takimit të Neshvilit, që
ka në qendër të vëmendjes përhapjen e lajmit të Ungjillit. - Pa Zot, njeriu është
i mangët e nuk gjen paqe – vëren Ati i Shenjtë - e në vijim citon fjalët e Shën Agostinit,
sipas të cilit ‘Zemrat tona nuk gjejnë paqe, deri në çastin kur pushojnë në Tënzonë”.
Kur e njohim Zotin dhe e pranojmë në jetët tona – shkruan Benedikti XVI – atëhere
e kuptojmë madhështinë e thirrjes sonë për të qenë bij të Hyjit. Si nënvizon, në
Mesazh, kontributin e Kalorësve të Kolombos gjatë 125-vjetëve të historisë së tyre,
Papa thekson edhe rolin e rëndësishëm të laikëve në Kishë. Më pas, duke kujtuar
shembullin e themeluesit të Kalorësve të Kolombos, Atë Majkëll McGivnei, Benedikti
XVI falënderon Urdhërin për ndihmën e vazhdueshme që u ka dhënë të varfërve e të sëmurëve,
por edhe për dëshminë në mbrojtje të vlerës së martesës e të familjes. Pikërisht familja
– vijon Ati i Shenjtë - është Kishë shtëpijake që me praninë e vet e shndërron shoqërinë
nga brënda. Prandaj Papa i falënderoi Kalorësit e Kolombos për kontributin që kanë
dhënë e japin në ndërtimin e Mbretërisë së Hyjit mbi tokë. Benedikti XVI e përfundon
mesazhin duke kujtuar Nënë Terezën. Rregulltarja mësonte gjithnjë se koha që i kushtohet
Zotit në lutje, jo vetëm që nuk e cënon shërbimin ndaj të afërmit, por është burim
i pashterrshëm i këtij shërbimi. Prej këndej Papa i porosit Kalorësit e Kolombos ta
ushqejnë impenjimin e tyre misionar me lutje të vazhdueshme.