(08.08.2007 RV)Lumenj gjaku në Irak. Forcat amerikane të sigurisë kanë bombarduar
lagjen shiite të Sadr Sitit në Bagdad, duke shkaktuar së paku 30 viktima, sipas disa
burimeve, por shifra nuk është akoma e saktë. Sulmi bëhet në ditën e parë të shtetrrethimit,
ndër tre të dekretuarat, në prag të shtegtimit vjetor shiit në kryeqytetin irakian.
Shiitët kremtojnë përvjetorin e vdekjes së imamit Musa Kadim. E ndërsa 13 të arrestuarit
dhe viktimat, akuzohen nga forcat amerikane si bashkëpunëtorë të Iranit, kryeministri
irakian Al Maliki mbërriti sot në Teheran për të vazhduar bisedimet mbi stabilitetin
dhe sigurinë në vend. Kombet e Bashkuara janë gati të forcojnë rolin e tyre
në Irak, gati 4 vjet pas atentatit që i kushtoi jetën përfaqësuesit të OKB-së
në Bagdad, Serxho Viera de Melo, 21 personave të tjerë, dhe solli tërheqjen e personelit
të OKB-së. Tani, Pallati i Qelqit ka deklaruar se do ta rrisë numrin e personelit
dhe do t’i japë përfaqësuesit të ri, që do të zëvendësojë pakistanezin Ashraf Oazi,
më shumë pushtet për të këshilluar qeverinë irakiane mbi çështjet ekonomike, politike,
zgjedhore dhe kushtetuese, si dhe përsa i përket refugjatëve. Luftime në Afganistanin
jugor ndërmjet talebanëve dhe ushtarëve të koalicionit ndërkombëtar kanë shkaktuar
mëse 80 viktima, të gjithë talebanë. Nga ana tjetër, rebelët janë treguar të gatshëm
të dorëzojnë të gjitha pengjet koreanojugore në këmbim të lëshimit të të burgosurve
afganë. Por ushtria deklaron se është gati t’i lirojë me forcë. Ndërkaq, nesër fillon
në Kabul, Kuvendi i pleqve të Pakistanit dhe Afganistanit. Është hera e parë që 700
të urtë nga të dyja vendet mblidhen për tri ditë për të pleqëruar punët e të dyja
vendeve. Presidenti i Pakistanit, Musharraf nuk do të marrë pjesë.
Kina po
përgatitet me pohe e bujë për Lojrat olimpike të 8 gushtit 2008, për t’i treguar krejt
botës fuqinë e vet. Por Olimpiada është kthyer që tani në një ëndërr të keqe për një
pjesë të mirë të popullsisë. Janë ata njerëz, që kanë fatin e keq të banojnë në shtëpitë,
që qeveria e Pekinit ka vendosur t’i rrafshojë për të ndërtuar shtëpitë për sportistët,
stafin dhe organizimin e Lojrave. Familjet e nxjerra papritur nga banesat e tyre janë
me qindra dhe shuma që u jep shteti është më e vogël nga ajo që do të kishin fituar
po ta kishin shitur shtëpinë. E madje edhe këto para të premtuara, nuk duken në horizont.
Kush proteston arrestohet dhe pikturohet nga shtypi si keqbërës. “Pas Olimpiadës
qëndrojnë gjaku dhe mundi i njerëzve të thjeshtë”, komentojnë personat që u ka
rënë në kokë një hall i tillë.