Duke lexuar librin ‘Jezusi i Nazaretit’ mund të takosh vetë Benediktin XVI.
(07.08.2007 RV)Siç njoftoi pak
ditë më parë në mikrofonin e Radios sonë drejtori i Shtëpisë Botuese të Vatikanit,
don Gjuzepe Kosta, libri i Benediktit XVI “Jezusi i Nazaretit”, katër muaj pas botimit,
vijon të jetë në krye të klasifikimeve të ndryshme e të botohet në gjuhë të reja.
Fryt i kërkimit të thellë mbi figurën e Jezusit, libri i tërheq njëlloj si studiuesit
e teologjisë, ashtu edhe besimtarët e thjeshtë, siç na e shpjegon teologu don Nikola
Buks, zevendës-kryetar i Institutit ekumenik “Shën Nikolla” pranë Universitetit Papnor
të Shën Tomës: Përgjigje: - Është një libër, në të cilin kam gjetur një
kyç, që më ndihmon për ta përkufizuar kështu: libër në të cilin gjejmë zbulesën, libër
që na ndihmon të njohim Hyjin, sepse Jezusi erdhi në botë kryesisht për të na dëftuar
Hyjin si Atë. Është libër që na ndihmon ta kuptojmë këtë e të vijojmë ta jetojmë konkretisht
sot, duke mos harruar se kjo Fjalë e Krishtit dëgjohet përsëri çdo ditë në ambjentin
e gjallë të liturgjisë, dmth në kultin e Kishës. Në këtë këndvështrim, në librin e
Atit të Shenjtë zbulesa e Hyjit nga ana e Jezusit, bëhet liturgji, bëhet adhurim.
E kjo, sepse në fund të fundit, të njohësh Jezusin, do të thotë të adhurosh Hyjin,
të udhëhiqesh për ta adhuruar Hyjin. Pyetje: - Benedikti XVI po shkruan
vëllimin e dytë të librit kushtuar ‘Jezusit të Nazaretit’. Ja, ju e njihni prej vitesh
Papën Racinger dhe e dini se Atit të Shenjtë i pëlqen shumë të shkruajë, gjë që e
bën si shërbim…. Përgjigje: - Po, sepse të shkruash, në një farë mënyre,
do të thotë t’ua hapësh zemrën të tjerëve, për t’u treguar ç’mendon. Mund të them
se kur lexon librin, ku ndeshesh me një mendim tepër delikat, në një farë mënyre të
duket se takon edhe vetë Atin e Shenjtë, i cili është njeri shumë i përvujtë, plot
vëmendje për njeriun, por që përmes kësaj përvujtërie, shpreh gjithë sigurinë e fesë,
që Jezu Krishti erdhi t’ia komunikojë botës.