(06.08.2007 RV)Po vijojmë me emisionin
e pestë të ciklit radiofonik “Me nënë Terezën” kushtuar së Lumes Gonxhe Bojaxhiu,
të cilën e kemi ftuar simbolikisht të na flasë mbi jetën e saj, duke shfletuar librin
“Jeta ime’. Sot Nënë Terza kujton sa e lumtur ishte në Kongregatën e Loretos, ku
papritmas ndjeu një thirrje të re, brënda thirrjes së parë, thirrjen për t’iu kushtuar
njerëzve që duhet të vdisnin në mes të rrugës, vetëm pse ishin të varfër… E nis rrëfimin
me fjalët: Në Kongregatën e Loretos isha shumë e lumtur! Njëzet vjet me
radhë dhashë mësim në Kolegjin e Shën Marisë (St Mery’s School), që e ndiqnin kryesisht
fëmijët e shtresave të mesme, ndonëse kishte edhe bija të familjeve të pasura. Ishte
i vetmi kolegj katolik për vajza në Kalkutë. Nuk e di në se kam qenë mësuese e
mirë apo e keqe. Mendoj se këtë duhet ta dinë më mirë nxënëset e mia. Ajo që
mund ta them me siguri, është se puna mësimore më pëlqente shumë. Që kur u bëra
pjesëtare e Kongregatës së Motrave të Zojës së Loretos, misioni im ishte të jepja
mësim, gjë që, e bërë për Zotin, kthehet në një apostullim të mrekullueshëm. Jepja
mësim, por edhe i nxisja nxënëset e mia më të rritura të shkonin në lagjet e varfëra
për t’i ndihmuar të varfërit e braktisur. Personalisht nuk arrita ta kuptoj menjëherë
se Zoti po më thërriste për t’iu kushtuar plotësisht kësaj kauze, derisa një ngjarje
jashtzakonisht prekëse, më shtyu ta bëj këtë. Kjo ndodhi pas Luftës II Botërore.
Një ditë isha jashtë kuvendit, fare pranë Spitalit Këmpbell, kur më shkuan sytë tek
një grua që po vdiste nga uria fare pranë këtij vendi, të krijuar për të shpëtuar
njerëzit e sëmurë. Iu afrova, e mora në krahë dhe bëra çmos ta shtroj në këtë spital. Askush
s’ma vuri veshin, sepse gruaja që kisha ndër krahë, ishte e varfër. Duhet t’i mbyllte
sytë përgjithmonë në mes të rrugës. Duke lexuar Ungjillin, më kishte prekur në
mënyrë të veçantë fragmenti në të cilin Krishti pohon se kur u shërbejmë të vegjëlve,
atyre që kanë uri, të sëmurëve, të braktisurve, është njëlloj si t’i kishim shërbyer
Atij vetë. Kështu m’u duk se kisha zbuluar rrugën time të vërtetë dhe e pranova
menjëherë si një dhuratë të mrekullueshme që më vinte nga qielli. Ishte si një
thirrje brënda thirrjes. Një gjë e tillë i ngjet një thirrjeje të dytë. Ishte
një urdhër i brëndshëm që më shtynte të largohesha nga Kongregata e Loretos, ku isha
tepër e lumtur, të braktisja rehatin e të dilja në rrugë të madhe, për t’u bërë motra
e të varfërve. Në vitin 1946, ndërsa po udhëtoja me tren në Dajerling për të bërë
ushtrimet shpirtërore, ndjeva përsëri thirrjen për të lënë gjithçka, për të ecur në
gjurmët e Krishtit në lagjet e jashtme të qytetit e për t’i shërbyer Zotit përmes
të varfërve më të varfër.Kuptova çka donte nga unë Krishti!