(06.08.2007 RV)29-vjet më parë,
më 6 gusht 1978, pikërisht në solemnitetin e ‘Të Shndërruemit të Zotit’, në Kastel
Gandolfo vdiste Papa Pali VI. E kujtoi dje Benedikti XVI në lutjen e Engjëllit të
Tënzot, duke theksuar shërbimin besnik të Papës Montini ndaj Zotit e Kishës së tij,
në vite jo të lehta. Benedikti XVI ka qenë gjithnjë shumë i lidhur me Palin VI:
ishte Papa Montini ai, që e emëroi kryeipeshkëv të Munihut dhe kardinal, në vitin
1977. Më 3 marsin e kaluar, duke pritur anëtarët e Institutit Pali VI, Benedikti
XVI e quajti ‘Papa i paharrueshëm’. U thirr ‘nga Provania Hyjnore për të mbajtur timonin
e barkës së Shën Pjetrit në një periudhë historike plot sfida problematike, në të
cilën u dallua për urtinë e maturinë e tij e sidomos për zellin misionar, që e nxiti
të bënte disa shtegtime apostolike, edhe drejt vendeve të largëta, duke kryer gjeste
profetike me vlerë të madhe kishtare, misionare e ekumenike'. Ishte i pari papë që
shkoi në Tokën Shenjte, duke i treguar kështu Kishës se rruga e misionit të tij niste
në gjurmët e Krishtit: “Në fakt, sekreti i veprimtarisë baritore që Pali VI
e kreu me përkushtim të palodhshëm, duke marrë nganjëherë vendime të vështira, që
nuk patën fare popullaritet, qëndron pikërisht në dashurinë për Krishtin: dashuri
që ndjehet thellë në të gjitha mësimet e tij. Shpirti i tij prej bariu ishte i rrëmbyer
nga tensioni misionar, i ushqyer nga dëshira e sinqertë për të dialoguar me njerëzimin.
Ftesa e tij profetike, e propozuar shumë herë, për të rinuar botën e trazuar nga shqetësimet
e dhuna përmes qytetërimit të dashurisë, lindte nga besimi i plotë në Jezusin, shpëtimtarin
e njeriut”. E emri i këtij Pape, që opinioni publik ia kuptoi madhështinë vetëm
kur vdiq - pati nënvizuar Benedikti XVI – mbetet i lidhur posaçërisht me Koncilin
II të Vatikanit: “Në se ishte Gjoni XXIII që e thirri dhe e filloi, i takoi
atij, pasardhësit, ta çojë përpara me dorë të mësuar, delikate e të vendosur. Jo më
pak e vështirë ishte për Papën Montini ta drejtonte Kishën në periudhën pas-konciliare.
Nuk ia lejoi vetes të kushtëzohej nga keqkuptimet e kritikat, ndonëse iu desh të
duronte vuajtje e sulme, nganjëherë të tërbuara, por mbeti, në çdo rrethanë, timonier
i vendosur e i urtë i barkës së Pjetrit”.Sipas Benediktit XVI, me kalimin e viteve
del gjithnjë më shumë në pah rëndësia që pati për Kishën e për botën papnia e Palit
VI, e jo më pak, edhe vlera e magjisterit të tij të lartë, nga i cili u frymëzuan
pasardhësit e tij, duke e përfshirë edhe atë vetë.