Rubrika ‘Me Nënë Terezën’: në emisionin e tretë na flet për familjen e saj.
(03.08.2007 RV)Në emisionin e tretë
të ciklit radiofonik kushtuar jetës të së Lumes Nënë Terezë, titulluar “Me Nënë Terezën”,
mbështetur te libri biografik ‘Jeta ime’, rregulltarja shqiptare sot na flet simboliksiht
për familjen e saj:
Një familje shumë e lumtur Ishim një
familje shumë e lumtur – na tregon Gonxhe Bojaxhiu. Gjithnjë tepër të bashkuar,
u afruam edhe më shumë me njëri-tjetrin pasi vdiq im atë. Jetonim njëri për tjetrin
e secili shqetësohej kryesisht për t’i bërë të lum anëtarët e tjerë të familjes. Posaçërisht
nëna ime. Ishte gjithë ditë e zënë me punë. Pavarësisht nga gjithë ky mundim,
kur binte muzgu, shpejtonte ritmin e rangëve të shtëpisë, që të ishte krejtësisht
gati kur të kthehej babai nga puna. Asokohe nuk arrinim ta kuptonim pse e bënte
këtë. Qeshnim me të e nganjëherë edhe talleshim paksa. Vetëm tani e kuptoj
sa e madhe e delikate ishte dashuria për të zotin e shtëpisë. Ndërpriste çdo punë,
kur ndjehej hapi i tij e bëhej gati ta priste me gjithë ngrohtësinë e mundshme. Po,
nëna ime ishte grua shenjte. Përpiqej t’i edukonte fëmijët me dashurinë për Zotin
e për të afërmin. Bënte të gjitha përpjekjet që të rriteshim të bashkuar e ta donim
me gjithë zemër Jezusin. Ajo vetë na përgatiste për Kungimin e parë.E ishte pikërisht
Nëna jonë ajo, që na mësoi ta duam Zotin mbi gjithçka.