Rubrika ‘Me Nënë Terezën’ e cila, në emisionin e parë, fillon të na flasë për jetën
e saj.
(01.08.2007 RV)Në atmosferën meditative
që krijojnë dy data përkujtimore: 26 gushti, 97 vjetori i lindjes së Ganxhe Bojaxhiut
dhe 5 shtatori, kur mbushen 10 vjet nga dita e kthimit të së Lumes Terezë tek Ati
qiellor, e ftuam simbolikisht Nënë Terezën në mikrofonin tonë, duke iu lutur të na
e tregojë, me gojën e vet, jetën e saj aq të jashtzakonshme, me besim se vendi i
themelueses të Kongregatës së bamirësisë nuk do të mbetet kurrë i zbrazët: të tjerë
po ecin e do të ecin në gjurmët e saj, drejt të varfërve, dmth drejt Krishtit. Për
Nënë Terezen janë shkruar shumë biografi. Është realizuar edhe një film, pa kujtuar
këtu mijëra shkrime kushtuar së Lumes, që kanë parë e shohin dritën e shtypit në revistat
e gazetat e mbarë botës, sepse misioni i saj vijon. Vijon jo vetëm përmes veprimtarisë
së mijëra motrave të saj, por edhe përmes veprimtarisë së përditshme të çdo besimtari
të krishterë, që dëshiron të shuajë etjen e Krishtit në kryq për dashuri. Ndërmjet
gjithë këtyre shkrimeve, zgjodhëm biografinë, që na u duk më afër së vërtetës mbi
jetën e saj. Nuk është autobiografi, që e shkroi ajo vetë, me dorë të saj. Nënë
Terezës as që i shkoi ndonjëherë mendja të shkruante një autobiografi. Ndoshta, po
ta kishte porositur Papa (e ajo njohu Papën Pali VI e Gjon Palin II) edhe mund ta
kishte shkruar, për të bërë dëgjesën shenjte. Por atë që nuk ia kërkuan kurrë papët,
ajo e tha me gojë, për t’i shprehur Jezusit dashurinë e saj të pakufishme, pa i shkuar
në mend se dikush i mblidhte ditë për ditë fjalët e saj. Këto fjalë, të mbledhura
nën kujdesin e Josè Luis Gonazales-Balado, u radhitën në librin ‘Jeta ime’, që ju
ftojmë ta shfletojmë së bashku në një cikël emisionesh kushtuar së Lumes, titulluar
‘Me Nënë Terezën’ duke nisur nga: “Thirrja e familja e Nënë Terezës”: (Zëri
i Nënë Terezës) Me gjak e gjini jam shqiptare; me nënshtetësi, indiane. Jam
murgeshë katolike. Për thirrje, i përkas mbarë botës, por zemra ime i përket
plotësisht Zemrës së Krishtit. Linda në Shkup (Shqipëri) në vitin 1910, Im
atë kishte një dyqan të vogël ku shiste material ndërtimi. Kisha një motër e një
vëlla. Ishim familje e lume. E shumë e bashkuar.
Unë jam një lapës i vogël
në dorë të Zotit. Është ai që shkruan. Ai, që mendon. Është ai që vendos. E
përsëris. Unë jam veç një lapës i vogël, i vogël. Isha ende shumë e re – vetëm
12 vjeçe – e jetoja në gjirin e familjes, kur ndjeva për herë të parë dëshirën për
t’iu kushtuar plotësisht Zotit. Mendova për këtë dëshirë, duke u lutur për ditë,
gjashtë vjet me radhë. Nganjëherë më dukej se s’më kishte thirrur askush, se nuk
duhet të shkoja askund. Gjithsesi do të vinte çasti kur do të bindesha për thirrjen
time. Zoja e Letnicës ndërmjetësoi për mua e më ndihmoi ta dëgjoj zërin e Zotit
që më thërriste vërtet. Në çastet kur nuk isha e sigurtë për thirrje, më ndihmoi
shumë këshilli i nënës sime, që më thoshte gjithnjë: “Kur ta pranosh një detyrë, çoje
deri në fund me gëzim. Përndryshe, mos e prano fare”. Një herë i kërkova drejtuesit
tim shpirtëror një këshill për thirrjen time. E pyeta: “Si mund ta di se Zoti më
thërret e pse më thërret? Më përgjegji:“Do ta kuptosh, në se do ta ndjesh veten
të lumtur. Në se do të të bëjë të lumtur ideja se Zotit të thërret për t’i shërbyer
Atij e të afërmit, kjo do të jetë prova e sigurtë për thirrjen tënde. Gëzimi i zemrës
është si një lloj busulle. Duhet të shkojmë ku na drejton, edhe atëherë kur busulla
na prin drejt një shtegu të shtruar me gjemba.