Papa në audiencën e përgjithshme: feja shprehet përmes dashurisë. Përshëndetja drejtuar
skautëve dhe gëzimi për fitoren e Kupës së Azisë nga Iraku.
(01.08.2007)Rreth 5 mijë besimtarë
e pritën sot paradite në sallën e Palit VI Benediktin XVI, që erdhi me helikopter
në Vatikan nga Kastel Gandolfo pikërisht për audiencën e përgjithshme. Duke vijuar
katekizmin për Etërit e Kishës, Papa përfundoi atë që kishte nisur më 4 korrikun e
kaluar, kushtuar Shën Bazilit. Theksoi kryesisht thirrjet e Shenjtit drejtuar besimtarëve
për të medituar mbi misterin e Zotit, për t’u treguar të kujdesshëm ndaj të afërmit
dhe për t’u dhënë shembull të mirë të rinjve. Së fundi Papa përshëndeti skautët,
që sot kremtuan njëqindvjetorin e historisë së tyre dhe shprehu gëzimin për fitoren
e kupës së Azisë nga skuadra irakiane e futbollit. Shën Bazili mund të konsiderohet
një nga etërit e Doktrinës Shoqërore të Kishës; me jetën e me shkrimet e tij na fton
të reflektojmë për misterin e Hyjit, të pranojmë se veprat e dashurisë së krishterë
kanë rëndësi të dorës së parë për të shprehur fenë e t’i nxisim, si Ai, të rinjtë,
për të kërkuar me ngulm të vërtetën. Këtë nënvizoi Benedikti XVI, duke vënë në dukje
pse ky Atë i Kishës, që ka jetuar në shekullin IV, është tepër aktual: “Së pari,
pse na nxit për një pjesëmarrje të vëmendshme, kritike e krijuese në kulturën e sotme;
pastaj për përgjegjësinë shoqërore, në kohën kur në botën e globalizuar edhe popujt
gjeografikisht të largët, janë vërtetë i afërmi ynë; për miqësinë me Krishtin, me
Hyjin që ka fytyrë njerëzore e, së fundi për njohjen e Hyjit krijues, Atë i të gjithëve.
E vetëm në se ia hapim zemrat këtij Hyji, që është Ati ynë i përbashkët, mund të krijojmë
një botë të drejtë, një botë vëllazërore” Papa kujtoi thirrjet e vazhdueshme
që Shën Bazili u drejtonte besimtarëve për t’i shfrytëzuar energjitë që burojnë nga
Pagëzimi në drejtim të Eukaristisë, për të mos përbuzur asnjë njeri e për të mos e
fyer Krishtin, duke u sjellur në mënyrë çnjerëzorë me të tjerët. Kur ia ngulim sytë
Krishtit - pohoi Papa - e kuptojmë plotësisht ç’do të thotë dinjiteti i njeriut e,
si citoi një homeli të Atit të Kishës, shtoi: “I krishteri, duke jetuar në përkim
me Ungjillin, pranon se njerëzit janë të gjithë vëllezër ndërmjet tyre; se jeta është
mbarështim i të mirave që kemi marrë nga Zoti e se secili nga ne ka përgjegjësi ndaj
të tjerëve”. Duke përshkruar kujdesin e Shën Bazilit për të rinjtë, Benedikti
XVI vuri theksin mbi rëndësinë që i jep Ati i Kishës studimit të klasikëve të letërsisë
greke e latine: “Duhet marrë nga tekstet e autorëve klasikë ajo, që është bindëse
e që përkon me të vërtetën: e kjo duhet bërë duke i parë me sy kritik, duke dalluar
të mirën nga e keqja. Këta libra duhen përdorur duke ndjekur shembullin e bletëve.
Ato shkojnë të thithin nektar lule më lule, por nuk thithin gjithçka, marin vetëm
atë që u duhet për të bërë mjaltin e të tjerat i lënë. Edhe ne, në se jemi të urtë,
marrim nga këto shkrime atë që na duhet, që përkon me të vërtetën e lëmë mënjanë
atë që nuk na shërben”.Në përfundim të audiencës, Benedikti XVI shprehu kënaqësinë
për fitoren e Kupës së Azisë nga skuadra irakiane e futbollit, duke theksuar: “Mbeta
thellësisht i prekur nga entuziazmi që përfshiu të gjithë banorët, duke i shtyrë të
dalin nëpër rrugë për të festuar këtë ngjarje të madhe. Ashtu si shumë herë kam qarë
së bashku me irakianët, ashtu kësaj here u gëzova së bashku me ta. Kjo përvojë e ndarjes
së gëzimit me të tjerët tregon dëshirën e këtij populli për një jetë normale e të
qetë. Uroj që kjo ngjarje të kontribuojë për të realizuar në Irak, me ndihmën e të
gjithëve, një ardhmëri me paqe e liri të vërtetë”.