Sekuestrimi i njerëzve të pafajshëm është në kundërshtim me ligjin hyjnor: thirrje
e Papës në lutjen e Engjëllit të Tënzot për lirimin e pengjeve në Afganistan dhe për
çarmatimin bërthamor.
(30.07.2007 RV)Paqja, impenjimi
kundër armatimeve bërthamore dhe thirrja që të lihen të lirë pengjet koreane në Afganistan
– ishin temat që preku dje Papa në lutjen e Engjëllit të Tënzot në selinë verore të
Kastel Gandolfos, pas periudhës së kaluar në Lorencago të Kadores, mes bjeshkëve të
Dolomiteve. Për ta pritur, në qytezën laciale, që Papa e quajti ‘vendlindja ime e
dytë’ – qindra kastelanë e veronjës, mbledhur në oborrin e Pallatit apostolik. Benedikti
XVI bëri thirrje për lirimin e 22 jugkoreanëve, prej 12 ditësh peng në duart e luftëtarëve
talebanë. Fjalët e Papës, shqiptuar pas lutjes mariane, iu drejtuan të gjithë atyre
që janë njollosur me një krim të tillë në vise të ndryshme të botës: “Po përhapet
ndërmjet grupeve të armatosura praktika e përdorimit të njerëzve të pafajshëm për
realizmin e qëllimeve të tyre. Kemi të bëjmë me shkelje të rënda të dinjitetit të
njeriut, që janë në kundërshtim me çdo normë fillestare të qytetërimit e të së drejtës
e që e fyejnë rëndë ligjin hyjnor. Bëj thirrje që autorët e akteve të tilla kriminale
të heqin dorë nga e keqja e bërë dhe t’i kthejnë të pacënuara, viktimat e tyre”.
Paqja në Tokë - në qendër të vëmendjes së Benediktit XVI i cili, para se
të kremtonte lutjen e Engjëllit të Tënzot u ndal tek një përvjetor i rëndësishëm:
më 29 korrik, 50-vjet më parë, hynte në fuqi Statuti i Agjensisë Ndërkombëtare për
Energjinë Atomike (AIEA), themeluar – kujtoi Papa – me mandatin për të nxitur e për
të zhvilluar kontributin e energjisë atomike në shërbim të paqes, të shëndetit e të
prosperitetit të botës mbarë, qëllime këto, me të cilat bashkohet plotësisht Selia
e Shenjtë, anëtare e këtij organizmi qysh nga themelimi, që vijon ta mbështesë veprimtarinë
e saj: “Ndryshimet epokale që kanë ndodhur në 50-vjetët e fundit, vënë në dukje
se, në udhëkryqin e vështirë në të cilin ndodhet njerëzimi, është gjithnjë më aktual
e më urgjent impenjmi për inkurajimin e mospërhapjes së armëve bërthamore, për promovimin
e konkordatit progresiv të çarmatimit bërthamor e për favorizimin e përdorimit paqësor
e të sigurtë të teknologjisë bërthamore, për një zhvillim të vërtetë, që respekton
ambientin e i kushton vëmendje të dorës së parë popullsive më pak të zhvilluara”.
Gara e armatimeve – kujtoi Papa, duke cituar atë që shkruhet në Katekizmin
e Kishës Katolike – duhet të zevendësohet me përpjekjen e përbashkët për shfrytëzimin
e burimeve, në shërbim të objektivave, që i japin shtytje zhvillimit moral, kulturor
dhe ekonomik, duke rishikuar përparësitë dhe shkallën e vlerave. “Më pas, një
lutje për paqe drejtuar Zojës së Bekuar: “…posaçërisht që njohuritë shkencore
e teknike të zbatohen gjithnjë me ndjenjën e përgjegjësisë për të mirën e përbashkët,
duke respektuar plotësisht të drejtën ndërkombëtare”. Së fundi, përshëndetjet,
në gjuhë të ndryshme, duke filluar nga përshëndetja drejtuar polakëve, përmes së
cilës kujtoi shtegtarët e vdekur në aksidentin rrugor gjatë kthimit nga shenjtërorja
e La Salettë. “Zoti ju mbrojtët të gjithë juve – tha më pas Papa – në rrugët që ju
çojnë drejt vendit të pushimeve”; më pas përshëndetja të rinjve, sidomos kastelanëve,
që dje merrnin pjesë në festën tradicionale të mbledhjes së pjeshkëve; e, së fundi,
falënderimi për kryetarin e bashkisë të Kastel Gandolfos, për autoritetet lokale,
famullitarin si dhe meshtarët e famullisë së Shën Tomës nga Vilanova, ku Ati i Shenjtë
do të kremtojë Meshën Shenjte në solemnitetin e Ngjitjes së Zojës së Bekuar në qiell.