Kryqi dhe ikona e DBR-së Sidneit 2008 shtegtojnë nga Meitlëndi në Lismore të Australisë.
(29.07.2007 RV)Kryqi dhe ikona e Ditës XXIII Botërore të Rinisë vijon të shtegtojnë
nëpër dioqezat e Australisë. Këtë javë simbolet e DBR-së arritën në dioqezën Meitlënd-
Njukastël, ku u pritën nga mijëra besimtarë e ku do të qëndrojnë deri të martën e
ardhshme, më 31 korrik. Simbolet, mbartur nga një grup të rinjsh, shtegtuan nëpër
fshatrat e përmbytura nga shirat e shumta që ranë këto ditë, duke shkatërruar prodhimet
bujqësore. U kremtua edhe një procesion si edhe ceremonia tradicionale e tymit. Më
31 korrik të rinjtë e Mëitlënd- Njukastël do t’ua dorëzojnë Kryqin dhe ikonën e DBR-së
bashkëmoshtarëve të dioqezës së Lismores. Sipas njoftimit përmes kanalit të vet të
internetit, dioqeza e Meitlëndit do të mikpresë më se 3 mijë të rinj amerikanë, holandezë
e jugamerikanë. E nuk duhet harruar kryesorja: ka filluar tashmë përgatitja shpirtërore
për ngjarjen e madhe. Ky muaj është tepër i pasur me katekizëm, veprimtari solidariteti
e vullnetariati. Natyrisht, në qendër të vëmendjes, është reflektimi i Papës në Mesazhin
për Ditën Botërore të Rinisë, 2008, që do të kremtohet pas një viti.