Izraeli: shpejt bisedime për paqen me palestinezët
(27.07.2007 RV)Kryeministri izraelit Ehud Olmert dëshiron të fillojë urgjentisht
bisedimet për paqen me palestinezët. Sipas zv.kryeministrit, që nga marrja e Rripit
të Gazës nga Hamasi, presidenti palestinez dhe kryeministri i ri kanë treguar një
dëshirë të madhe për bashkëpunim e janë impenjuar në procesin e paqes dhe në luftën
kundër terrorizmit. Në mbështetje të këtyre deklaratave, gazeta izraelite “Haretz”
shkruan sot se organizata palestineze të sigurisë, besnike ndaj presidentit Abu Mazen,
i kanë dhënë Izraelit informacione të dobishme për të ndaluar atentate terroriste
në shtetin hebraik. Ndërkaq, nga ana palestineze, presidenti Abu Mazen përgatitet
të lajë llogaritë me ata që lejuan kalimin e Rripit të Gazës në duart e Hamasit. Sot,
atij iu dorëzua një raport 200 faqesh, ku akuzohen repartet e al Fatahut në Gazë për
nepotizëm e mungëse koordinimi. Raporti nuk është bërë publik, por thuhet se në të
shpjegohet se grupet e Al Fatahut ishin infiltruar nga njerëz të Hamasit, të cilët
e morën kalanë nga brenda. Në planin politik, një grup eksponentësh politikë,
afaristë dhe personalitete të tjera palestineze po punojnë për të formuar një parti
të tretë, të ndryshme nga Al Fatahu dhe Hamasi, në perspektivën e zgjedhjeve të reja
të mundshme. Thuhet se kjo parti mbështetet nga kryeministri i përkohshëm, Salam Fajad,
por ky i fundit nuk ka bërë asnjë koment për çështjen.