Takimet e para për Toni Blerin në Lindjen e Mesme e lajme të tjera
(27.07.2007 RV)Ndërsa demokratët amerikanë përpiqen të sigurojnë afate për
kthimin e trupave nga Iraku, komanda ushtarake ka përgatitur një plan, që parashikon
një rol të rëndësishëm të SHBA-ve në vend të paktën deri në verën e vitit 2009. Dokumenti,
i botuar sot në gazetën “Nju Jork Tajms” flet për forcimin e sigurisë në Bagdad dhe
ndihmesën për pajtimin e liderëve politikë, deri në dorëzimin e armëve nga grupet
e rebelëve. Në terren, forcat amerikane kanë kapur sot 20 terroristë në veri të
Irakut. Në një atentat të përgjakshëm në Hila, janë vrarë 26 vetë dhe janë plagosur
mëse 60 të tjerë. Ndërkaq, në raundin e dytë të bisedimeve SHBA-Iran në nivel ambasadorësh,
Uashingtoni akuzon Iranin se mbështetja që u jep milicive shiite është rritur. Gjithsesi,
është rënë dakord që të krijohet një komitet i përbashkët ndërmjet amerikanëve, iranianëve
dhe irakianëve për problemet e sigurisë e të stabilitetit në Irak.
Parlamenti
evropian përshëndeti me kënaqësi lirimin e 5 infermiereve bullgare dhe të mjekut
palestinez me kombësi bullgare, të ekstraduar nga Libia për në Bullgari e më pas të
falur nga presidenti bullgar, Parvanov. Deklarata u bë sot nga presidenti i Asamblesë
evropiane, Hans Gert Pëtering. Sipas Libisë, stafi mjekësor ishte përgjegjës për infektimin
e 400 fëmijëve libikë me virusin e Sidës, pavarësisht se bashkësia ndërkombëtare i
konsideronte të pabaza provat e paraqitura.
Takimet e para të ish-kryeministrit
britanik, Toni Bler me autoritetet izraelite dhe palestineze, në detyrën e të
dërguarit të Kuartetit për Lindjen e Mesme. Sot ai foli në Jeruzalem me presidentin
izraelit Shimon Peres dhe me kryeministrin Olmert, si edhe në Ramallah me presidentin
palestinez, Abu Mazen. “Nga bisedimet që pata, perceptova një lloj mundësie për paqe
– deklaroi Bler. Që kjo mundësi të kthehet në hapa konkrete duhet punuar e reflektuar
në kohë”.
Trupa afgane dhe ushtarake të koalicionit ndërkombëtar deklaruan
sot se kanë vrarë rreth 40 talebanë në Afganistan. Dje, talebanët hynë në luftime
me një karvan ushtarak, të cilin e sulmuan në provincën e Helmandit. Përsa i përket
pengut gjerman, talebanët kanë kërkuar tërheqjen e trupave të Gjermanisë dhe lirimin
e 33 të burgosurve, por nuk kanë vendosur ultimatum. Ka skaduar ndërkaq ultimatumi
për 23 evangjelistët koreanojugorë, të kapur javën e shkuar.