(23.07.2007 RV)Sot u mblodhën në
Bruksel, ministrat e jashtëm të Bashkimit Evropian, të cilët hapën konferencën ndërqeveritare
për Traktatin institucional evropian, por diskutuan edhe për argumente të tjera të
rëndësishme, si çështja e Kosovës. Që në fillim, konsultimet mes juristëve kanë
hasur në vështirësi. Polonia, pas problemeve që shkaktoi në qershor, kur u shpreh
kundër sistemit të ri të votimit në Bashkimin Evropian, sot kërkoi që të përdorte
opcionin e përjashtimit nga Karta e të Drejtave, e cila parashikohet në Traktatin
e ri institucional. Këtë opcion e ka përdorur në qershor edhe Britania e Madhe. Kalendari
i Konferencës ndërqeveritare, e shtata për Bashkimin Evropian, parashikon mbledhjen
e menjëhershme të juristëve e më pas një takim të ministrave të jashtëm në shtator.
Diskutimi do të vazhdojë në Këshillin evropian të 18 e 19 tetorit për t’u mbyllur
në dhjetor, në mënyrë që Traktati i ri të ratifikohet para zgjedhjeve evropiane të
vitit 2009 në 27 vendet anëtare. Nuk do të jetë argument bisede përmendja e rrënjëve
të krishtera të Evropës, pasi traktati i ri është një marrëveshje, një pakt ndërmjet
qeverish e jo më një Kushtetutë, në të cilën do të kishte vend edhe për shprehjen
e vlerave, mbi të cilat bazohet Bashkimi Evropian.
Përsa i përket Kosovës,
Bashkimi Evropian duhet të gjejë një gjuhë të përbashkët, me të cilën të paraqitet
në mbledhjen e Grupit të Kontaktit, të mërkurën, më 25 korrik. Pas falimentimit në
Këshillin e Sigurimit, për shkak të mundësisë që Rusia të vendoste veton, çështja
e Kosovës i kalon Grupit të Kontaktit, por siç shpjegoi sot ministri i jashtëm gjerman,
Shtajnmajer, kryesisht Trojkës së përbërë nga SHBA-të, Bashkimi Evropian dhe Rusia. Nga
ana tjetër, Ekipi i Unitetit të Kosovës, ku bëjnë pjesë presidenti, kryeministri
dhe kryetari i Kuvendit të Kosovës është takuar sot në Uashington me sekretaren amerikane
të shtetit, Kondolica Rajs dhe me zyrtarë të tjerë, ndër të cilët edhe këshilltari
për sigurinë kombëtare, Stefën Hadli. Amerikanët mendojnë se Kosova duhet të presë
përfundimin e bisedimeve në kuadrin e Grupit të Kontaktit, para së të marrë vendime
të njëanshme për statusin. Ndërkaq, sot në Prishtinë, është zhvilluar një
manifestim paqësor, në të cilën protestuesit kërkuan të caktohet një datë për shpalljen
e statusit të Kosovës.
Qeveria serbe miratoi sot një rezolutë të re
për Kosovën, e cila nesër do të diskutohet në parlamentin e Beogradit. Sipas tekstit,
Kosova mbetet nën sovranitetin e Serbisë. Autoritetet pohojnë se janë gati për një
fazë të re negociatash dhe i kërkojnë bashkësisë ndërkombëtare të sigurojë bisedime
të vërteta e të pakufizuara në kohë. Serbia, theksohet në rezolutë, do t’u përgjigjet
energjikisht të gjitha përpjekjeve për shpalljen e njëanshme të pavarësisë së Kosovës.
Ndërkaq, edhe ministri i jashtëm serb, Vuk Jeremiç pritet të takohet me sekretaren
amerikane të shtetit, Kondolica Rajs, të enjten.