Atë Bosi falënderon, plot emocion, nga Radio Vatikani, Papën dhe gjithë ata që e ndihmuan
deri në lirimin e tij.
(20.07.2007 RV)Mbarë Kisha, duke
nisur nga Papa, u gëzua për lirimin e Atë Gjankarlo Bosit, misionar i Institutit Papnor
të Misioneve të Jashtme, rrëmbyer më 10 qershorin e kaluar në ishullin Mindanao, në
Filipine. Meshtari u lirua dje rreth dhjetë kilometra larg nga famullia e tij e
Pajaos, ku kryen zakonisht shërbimin meshtarak. I dobësuar, me shenja të dukshme të
vuajtjes, ai shprehu menjëherë dëshirën për t’u kthyer në jetën e tij të përditshme. I
informuar për nismat e organizuara për lirimin e tij dhe për lutjet e Benediktit
XVI, meshtari, i prekur thellë, falënderoi – në mikrofonin e radios sonë – Atin e
Shenjtë dhe të gjithë ata që u përpoqën për lirimin e tij:Ja ç’na thotë Atë Bosi
nga Manila, ku do të qëndrojë disa ditë për të pushuar: Përgjigje: - Jam
mirë. I dobësuar pak, por për të tjerat, fare mirë. Pyetje: - Ç’mund të
na thoni për këto ditë? Përgjigje: - Është një përvojë që nuk ia uroj askujt,
sepse tepër e vështirë. Por megjithatë, më mësoi shumë gjëra, për të cilat besoj se
do të kem kohë të reflektoj më thellë. Rëndësi ka se nuk e humba për asnjë çast qetësinë
shpirtërore, e për këtë e falënderoj me gjithë zemër Zotin, që më ndihmoi ta duroj
me qetësi atë që po më ndodhte. Pyetje: - A flisnit me rrëmbyesit? Përgjigje:
- Flisja çdo ditë. Ata luteshin e unë lutesha. Një nga pyetjet që u bëra atyre,
pasi ia kisha bërë më parë vetes, ishte: “A jemi duke iu lutur të njëjtit Zot, apo
kemi të bëjmë me zota të ndryshëm, duke parë se ju luteni me pushkë në dorë të djathtë
e unë, me të dyja duart të lidhura? Isha i lidhur, sepse ata donin para për të blerë
armë. Prandaj më rrëmbyen. Pyetje: - Atë Bosi, ju jeni misionar. Përvoja
e rrëmbimit duhet t’ju ketë shtyrë të mendoni edhe për misionin… Përgjigje:
- Më bëri të kuptoj se jemi ende shumë larg nga çasti kur do ta shikojmë njëri-tjerin
si vëllezër. Po megjithatë besoj se do të vijë dita kur do të mund të themi njëzëri
se kemi një Zot të vetëm, që është Ati ynë e se prandaj jemi të gjithë vëllezër e
motra.