(19.07.2007 RV)Dy atentate të reja vdekjeprurëse në Pakistan, njëri në veri
e tjetri në jug. Numri i viktimave është së paku 41, por mund të rritet. Të plagosurit
arrijnë në mëse 60 vetë. Dhuna e ditëve të fundit është rezultat i prishjes së njëanshme
të armëpushimit me qeverinë nga ana e rebelëve talebanë, që rrezikon ta çojë vendin
në kaos.
Në përgjigje të përjashtimit nga territori britanik i 4 dipllomatëve
rusë, Moska do të largojë nga territori i vet 4 diplomatë të qeverisë së Londrës.
Deklarata është e ministrisë së jashtme ruse. Ashpërsohen kështu më tej marrëdhëniet
Britani e Madhe – Rusi, pasi Kremlini nuk pranoi ekstradimin e të dyshuarit kryesor
për vrasjen e agjentit rus Litvinienko, refugjat në Angli.
Në mesnatë me
orën evropiane, një shpërthim në gazsjellësin në Manhatën të Nju Jorkut ka
shkaktuar një viktimë e disa të plagosur. Fillimisht u mendua për një akt të ri terrorist,
por më vonë kjo mundësi u përjashtua.
Në Afganistan, një nga “zotërinjtë
më të fuqishëm të luftës”, lideri Hekmatjar ka shpallur armëpushimin me qeverinë
e presidentit Karzai. Nuk kuptohet nëse ky është një armëpushim i njëanshëm, apo
heqje dorë nga dhuna për të kaluar në veprimtari politike, megjithatë nuk ka dhënë
si rezultat ndalimin e dhunës, të dëshirueshëm për vendin.