OKB-ja denoncon situatën në Rripin e Gazës. Viktima të reja në Irak.
(17.07.2007 RV)Propozimi i presidentit amerikan Xhorxh Bush për organizimin
e një konference ndërkombëtare për paqen në Lindjen e Mesme është pritur mirë nga
bashkësia ndërkombëtare në përgjithësi e nga vendet arabe në veçanti. Përveç palestinezëve,
janë shprehur në favor të saj edhe autoritetet egjiptiane dhe mbreti i Jordanisë.
Ndërkaq, në Gazë mbetet shqetësuese gjendja humanitare. Agjensia e Kombeve të Bashkuara
për refugjatët palestinezë ka kërkuar ndërhyrjen e bashkësisë ndërkombëtare. Sipas
saj, janë të nevojshme 47 milion dollarë për ndërhyrjet e emergjencës. Situata mund
të përmirësohet disi së shpejti. Lideri politik i Hamasit, Khaled Meshal ka deklaruar
se lëvizja është gati t’ia dorëzojë qeverisë kontrollin e institucioneve të Gazës.
Gjendja humanitare është e vështirë edhe në Irak, ku sipas Organizatës
Botërore për Emigracionin, rreth 1 milion irakianë janë larguar nga shtëpitë që nga
shkurti i vitit 2006, kur sulmi kundër xhamisë shiite të Askarijes shënoi fillimin
e ndeshjeve pa fund ndërmjet sunitëve dhe shiitëve. Pas atentateve të djeshme që shkaktuan
rreth 100 viktima, edhe sot njerëz të veshur me uniformën e ushtrisë irakiane kanë
vrarë 29 vetë në një fshat të provincës së Dijalës. E atentate të përgjakshme ka pasur
edhe në Bagdad. Ndërkaq, Irani ka shprehur sot interes për rifillimin e dialogut mbi
Irakun me SHBA-të. Uashingtoni akuzon Teheranin se është bërë një ndihmës i pazëvendësueshëm
për kryengritësit shiitë në vend.