Ipeshkvijtë latinoamerikanë falënderojnë Papën për Konferencën e Aparesidës: intervistë
me kryetarin e ri të Çelamit, imzot Damasheno Asiz.
(13.07.2007 RV)Një përshëndetje
plot ngrohtësi e mirënjohje, në sa kujtojnë Konferencën V të përgjithshme të episkopatit
latinoamerikan e karaibik, e cila do të mbetet e paharrueshme në kujtesën e atyre,
që patën fatin të merrnin pjesë në punimet e saj! Këto ndjenja përmban një mesazh
drejtuar Benediktit XVI nga autoritetet e reja të Çelamit (Konferenca e përgjithshme
e episkoptatit latinoamerikan dhe karaibik), të kryesuara nga Imzot Raimundo Damasheno
Asiz, kryeipeshkëv i Aparesidës, qytetit brazilian ku u mbajtën punimet e Konferencës
ipeshkvnore. E nuk mungon as shprehja e mirënjohjes së thellë ndaj Papës nga ana e
ish-kryetarit të Çelamit, kardinalit Francisko Havier Errazuriz, kryeipeshkëv i Santjagos
së Kilit. Nesër do të jetë dita e fundit e punimeve për ipeshkvijtë latinoamerikanë,
të mbledhur që të martën e kaluar në ishullin e Kubës:Por për t’u njohur nga afër
me gjendjen shpirtërore të Kryetarit të ri, në prag të fillimit të mandatit në krye
të ipeshkvijve latinoamerikanë e karaibikë, të dëgjojnë vetë kryeipeshkvin Raimundo
Damasheno Asiz në mikrofonin e Radio Vatikanit: Përgjigje: - Unë
natyrisht nuk shpresoja të zgjidhesha, prandaj i shpreh mirënjohjen time ipeshkvijve,
që më besuan kryesinë e një organizmi kaq të rëndësishëm për Amerikën Latine. Mision
i vështirë për t’u kryer, por unë besoj në radhë të parë në ndihmën e Zotit, por edhe
në bashkëpunimin e të gjithë anëtarëve të tjerë të kryesisë e të gjithë atyre që do
të zgjidhen më pas si kryetarë të departamenteve të ndryshme të ÇELAM-it. Misioni
nuk mund të realizohet pa një punë në ekip, pa bashkëpunuar ngushtësisht, për të mirën
e mbarë Amerikës Latine, me objektiv kryesor, vënien në jetë të detyrave që përcaktoi
Konferenca V e Aparesidës, duke i pasur mirë parasysh porositë e Papës, zëri i të
cilit vijon të tingëllojë në mbyllje të Konferencës, të cilën e hapi gjatë shtegtimit
të tij apostolik në Brazil. E Papa porositi: “Kisha nuk bën prozelitizëm,
nuk shtrëngon askënd të bëjë pjesë në radhët e saj. Ajo nuk detyron por tërheq, ashtu
si Krishti, i cili i bën të gjithë për vete me forcën e dashurisë së tij, që arrin
kulmin në flijimin e Kryqit. Ju besoni në Zotin dashuri: kjo është forca juaj që
mund botën, është gëzimi, që askush nuk mund t’jua rrëmbejë, paqja që Krishti e fitoi
me Kryqin e tij. Kjo fe e bëri Amerikën ‘Kontinent të shpresës’. Nuk e bëri ndonjë
ideologji politike, as ndonjë lëvizje shoqërore e as ndonjë sistem ekonomik, por besimi
në Hyjin dashuri, që u mishërua, vdiq e u ngjall në Jezu Krishtin, themel i vërtetë
i kësaj shprese, e cila solli shumë fryte, që nga epoka e ungjillëzimit të parë e
deri më sot”.