Thirrje e Papës për ratifikimin e konventës në mbrojtje të punëtorëve emigrantë.
(11.07.2007 RV)Dje kryeipeshivi Agostino Marketo, sekretar i Këshillit Papnor
për baritorinë e emigrantëve dhe endacakëve, kryetar i delegacionit të Selisë së Shenjtë
në Forumin Global mbi emigracionin e zhvillimin, që vijon punimet në Bruksel, u bëri
thirrje, në emër të Papës, qeverive të vendeve të pasura, ta ratifikojnë Konventën
ndërkombëtare për mbrojtjen e të drejtave të të gjithë punonjësve emigrantë e të anëtarëve
të familjeve të tyre. Emigrantët duhet të respektohen e duhet t’u garantohen plotësisht
të gjitha të drejtat – kujtoi imzot Marketo – së pari për shkak të dinjitetit të tyre
njerëzor, por edhe pse japin një ndihmesë jo të pakët për mirëqenien e vendeve ku
punojnë. Prandaj kanë plotësisht të drejtë të sigurojnë një jetë dinjitoze, të trajtohen
njerëzisht në vendin ku punojnë, të kenë të drejtën e shkollimit, të mbrojtjes së
shëndetit, të zhvillimit njerëzor, kulturor e profesional, të shprehjes së lirë të
kulturës e të praktikimit të fesë së tyre si dhe të të gjitha shërbimeve të tjera
shoqërore. Por, përveç të drejtave, në fjalimin e tij prelati kujtoi edhe detyrat,
duke nënvizuar se të drejtat e detyrat shkojnë krah për krah e se prandaj emigrantët
duhet të respektojnë identitetin dhe ligjet e vendit të banimit, të luftojnë për integrim
të drejtë, jo për asimilim, në shoqërinë që i strehon e të mësojnë gjuhën e vendit
ku punojnë. Ata – shtoi përfaqësuesi i Vatikanit – duhet ta nderojnë e ta respektojnë
vendin strehues, madje duhet edhe ta duan e ta mbrojnë. Imzot Marketo foli edhe
për emigrantët e parregullt të cilët, pavarësisht nga gjendja e tyre e jashtligjshme,
kanë dinjitetin e tyre, që nuk mund të preket në asnjë situatë. Si pasojë, të drejtat
e tyre duhen mbrojtur, nuk duhen injoruar e aq më pak nuk duhen dhunuar. Për Selinë
e Shenjtë statusi i emigrantit të parregullt nuk ka të bëjë fare me kriminalitetin.
Rrugëzgjidhja më e mirë – tha në përfundim përfaqësuesi i Selisë së Shenjtë – është
ai i bashkëpunimit më të ngushtë ndërkombëtar për t’ia prerë rrugën emigracionit të
parregullt e për t’ia hapur shtigjet emigracionit të rregullt të njerëzve, që kërkojnë
një jetë më të mirë, duke respektuar plotësisht detyrat e tyre si emigrantë.