Përkujtojmë më 9 korrik, 83-vjetorin e lindjes së monsinjor Nikollë Minit.
(09.07.2007 RV)Lindi më 9 korrik 1924, në Ferizaj. Ishte më i vogli ndër katër
fëmijët, që Zoti u fali prindërve, Kolë Mini dhe Monika Kajtazi. Shumë shpejt mbeti
jetim dhe iu desh të strehohej në dyert e të afërmve. Fëmijë i mençur, jashtzakonisht
i shkathët, tërhoqi vëmendjen e meshtarëve vendas, që e përcollën në seminarin e Prizrendit
e pastaj në Seminarin e Shkodrës e të Zagrebit, ku kreu studimet filozofike e teologjike. U
shugurua meshtar njëherësh me Don Milorad Defarin, misionar kroat i mirënjohur ndërmjet
shqiptarëve me emrin Dom Mila, në vitin 1950. Nisi menjëherë shërbimin meshtarak kudo
e kërkoi Kisha: nga Shenjtnorja e Zojës së Crnagorës në Letnicë, në Novoselë të Gjakovës,
në Bec, Zym, Velezhë e në katedralen e Prizrendit, ku mbylli sytë më 15 maj 1992 në
elter, ndërsa kremtonte Meshën shenjte, duke vulosur kështu përkushtimin themelor
ndaj Kishës, për të cilën ishte përpjekur gjithë jetën. Figurë poliedrike, Monsinjor
Mini u dallua si Meshtar, si ndërtues kishash, organizator i rinisë katolike, mjeshtër
i korit kishtar, gojtar, publicist, autor i flepalosjes "Zani i Zojës së Crnagorës"
dhe i katekizmit me titull "Besimi katolik", themelues, bashkë me Imzot Nikë Prelën,
i revistës fetare-kulturore "Drita" e cila më vonë pati edhe shtëpinë e vet botuese
prej nga dolën shumë botime të reja.Në 11 vjetorin e vdekjes e kujtojmë si njeri që
jetoi për Zotin e me Zotin, për popullin e me popullin; si meshtar që jetoi për elterin
e mbylli sytë në eltér, duke lënë kështu gjurmë të pashlyeshme në jetën e Kishës e
të kulturës shqiptare, si model që meriton të ndiqet nga breznitë e reja.