Nesër Papa fillon pushimet verore në Lorencago të Kadores.
(08.07.2007 RV)Sot në Lorencago të Kadorës u organizua një procesion me qirinj
të ndezur për të përkujtuar pushimet e para të Shërbëtorit të Zotit, Gjon Palit II
në zonën kadorine. Procesionin e kryesoi don Françeko Silvestri, asistent i Veprimit
Katolik të Belluno-Feltres. E në sa Lorenzago kujton Gjon Palin II, përgatitet
për të pritur Benediktin XVI. Për ta organizuar sa më mirë këtë pritje është krijuar
një Komitet me përfaqësues vullnetarë të komunës e të famullisë së Shenjtorëve Ermagora
e Fortunato, që ka përgatitur edhe një kalendar për kremtimet, kohët e lutjes dhe
takimet kulturore, duke i sensibilizuar kështu të gjithë qytetarët për ardhjen e
mikut të madh. Bashkësia e krishterë e Lorenzagos shikon tek Benedikti XVI sidomos
pasardhësin e Shën Pjetrit, që në Kishën universale ka detyrën t’i përforcojë besimtarët
në fe. Ndërkaq dioqeza e Trevizos po i jep dorën e fundit përgatitjes së banesës,
ku nesër Ati i Shenjtë do të fillojë periudhën e pushimeve verore. E kjo, sepse shtëpia
ku do të strehohet Papa Racinger, pranë Kështjellës së Mirabelës, që do të përbujë
trupën e gjendarmerisë së tij personale, është pikërisht e Dioqezës së Trevizos. Benedikti
XVI do të pushojë në të njëjtën vilëz, ku pati pushuar gjashtë vera me radhë Gjon
Pali II, e pikërisht në vitet 1987-1988, 1992-1993, 1996, 1998. Pasi i ka kaluar dy
herë rresht pushimet në Lë Kombë të Vale d’Aostës, sivjet Benedikti XVI do të shkojë
në Kadore, në përkujtim të njëzetvjetorit të vizitës së parë të Gjon Palit II në këto
vise të mrekullueshme malore, që i kanë kushtuar Papës Vojtila një monumet artistik
pikërisht në hyrje të vilës ku pati pushuar. Ati i Shenjtë do të niset me automobil
nga Vatikani në orën 10 të ditës së hënë drejt Aeroportit të Çampinos, prej nga do
të fluturojë në aeroportin Trevizo- Istrana. Më pas do ta vijojë udhëtimin me helikopter
për në Lorenzago, ku pritet të arrijë rreth orës 12. 00. Papa do të pushojë në
Lorencago të Kadores nga 9 deri më 27 korrik. Përsa i përket lutjes së Engjëllit
të Tënzot, Ati i Shenjtë do ta kremtojë të dielën, më 15 korrik, nga selia e Kështjellës
së Mirabelës; ndërsa të dielën, më 22 korrik, nga Sheshi Kalvi i Lorencagos. Sipas
parashikimit, Benedikti XVI do të kthehet në Kastel Gandolfo në mbrëmjen e 27 korrikut.Gjatë
kësaj periudhe audiencat e përgjithshme të së mërkurës të datave 11, 18 e 25 korrik
do të ndërpriten, për të rifilluar të mërkurën, më 1 gusht, në orën 10. 00. Ndërpriten,
gjithashtu, të gjitha audiencat private e të posaçme.