Letra e Atit të Shenjtë me rastin e njëqindvjetorit të Skautizmit botëror.
(02.07.2007 RV)100 vjet më parë, në ishullin Braunsi, në Angli, lordi Robert
Baden-Pauel organizoi kampin e parë të skautëve në botë. Me rastin e këtij përvjetori,
që do të kremtohet më 1 gusht 2007, Benedikti XVI i dërgoi një letër kardinalit Zhan-Pierr
Rikard, kryetar i Konferencës Ipeshkvnore të Francës, ku menjëherë pas Luftës I Botërore
nisi historia e skautizmit katolik, në saje të veprimtarisë së Atë Zhak Sevë, themelues
i skautëve francezë. “Formimi i përgjithshëm i personalitetit të njeriut” – është
kjo mundësi – nënvizon Papa – që përmes lojës, veprimtarisë, aventurës, takimit me
natyrën, jetës në grup dhe shërbimit ndaj të tjerëve, u jepet pas njëqind vjetësh
të gjithë atyre që bashkohen me skautizmin. I fekonduar nga Ungjilli – nënvizon akoma
Benedikti XVI – skautizmi nuk është thjeshtë mjedis real i zhvillimit njerëzor, por
edhe mjedis i fitimit të pjekurisë shpirtërore e morale si dhe i shtegtimit të vërtetë
në rrugën e shenjtërisë. Kujtojmë se historia e lëvizjes skautiste në Shqipëri
nisi në vitet ‘90, e nxitur dhe e organizuar nën kujdesin e Kishës katolike. Në
rrugët e Shqipërisë së veriut e të Shqipërisë së mesme nisën të duken grupet e para
të të rinjve, veshur me uniformën sportive të kaltërt e blu, e cila i dallon nga të
gjitha grupet tjera që shtegtojnë në gjirin e natyrës. Më pas skautët nisën të organizohen
edhe në Administratën Apostolike të Shqipërisë së Jugut, duke përfshirë kështu gjithë
territorin kombëtar.Kujtojmë se përgjegjës i grupeve të skautëve me frymëzim katolik
në Shiqpëri, është jezuiti, Atë Bertrand, me qendër në Tiranë, e se edhe skautët shqiptarë
do ta kremtojnë njëqind vjetorin e themelimit të skautizmit botëror me një sërë nismash
e veprimtarish karakteristike për natyrën e lëvizjes së tyre.