(01.07.2007 RV)Sot, e diela XIII e kohës së zakonshme gjatë vitit kishtar,
Kisha katolike kremtoi Shenjtorët Juli e Aroni, martirë të Britanisë dhe Shën Aronin,
vëllaun e Moisiut, kryeprift i Besëlidhjes së Vjetër. Nesër, e hënë, do
të kremtohet festa e Shën Bernardinit dhe Shenjtorëve martirë Procesi, Martiniani
e Eutiki. Dishepuj të Jezu Krishtit, ishin gati të paguanin çdo lloj çmimi e të hiqnin
dorë nga çdo kërkesë e çdo vlerë, për të mos u ndarë kurrë nga Zoti, të cilin e dëshmuan
duke derdhur gjakun për dashuri të Tij. Liturgjia e së martes na kujton
se Shenjtit që kremtohet, Tomës Apostull, feja i dhurohet falas nga Zoti i ngjallur,
i cili fiton mbi të gjitha dyshimet e mosbesimet e nxënësit të vet. Me të e si ai
jemi të ftuar të shpallim: “Zoti im e Hyji im!” me bindjen se kush beson në Zotin,
do të shohë shëlbimin e tij. Të martën e ardhshme është edhe dita e festës së Shën
Leonit papë. Në festën e Shën Izabelës së Portugalisë, që do të kremtohet të
mërkurën, liturgjia na kujton se forca e së keqes, edhe kur shfaqet në formën
e saj më të tmerrshme e më tronditëse, nuk mund t’i bëjë kurrë ballë pranisë së Zotit,
i cili ia vë veshin britmës së njeriut të shtypun padrejtësisht, që e ngre zërin aq,
sa të dëgjohet deri te froni i Hyjit. Të brohorasim së bashku me liturgjinë
e festës së Shën Ndout Maria Zakaria, i cili do të kremtohet të enjten: ‘ Të
lavdëroj, o Zot, sepse më shëlbove!”. Shenjti themelues i Barnabitëve dhe i Motrave
Engjëllore të Shën Palit, na kujton një të vërtetë të madhe feje: “Edhe në se njerëzimi
do të arrijë t’i zhdukë të gjitha sëmundjet fizike e të zgjidhë shumë nga problemet
që e trondisin, nuk do të mundet kurrë ta çlirojë njeriun nga sëmundja më e rëndë,
mëkati. Këtë mund ta bëjë vetëm ndërhyrja e Zotit! Kujtojmë edhe se këtë ditë
Bijtë e bijat e Shën Ndout Maria Xakarisë do të jenë në festë. Prej kohe me mision
në Shqipëri, sidomos në Shqipërinë veriore, do ta kremtojnë festën e Themeluesit të
tyre në Fushë Milot. Të premten e ardhshme është festa e Shën Maria Goretit,
virgjër e martire, e papëve të Romës që pushojnë në paqe në Bazilikën e Vatikanit
dhe e së Lumes Maria Tereza Ledohovska, themeluese e Motrave misionare të Shën Pjetrit
Klaver. Ungjilli i liturgjisë së festës na çon në skenën e ballafaqimit të Krishtit
me farizejtë. Ata e qortojnë, sepse rri me mëkatarë. Ndërsa Zoti u kujton se janë
shkandullisht larg nga mëshira hyjnore. Të shtunën do të kremtohen
Shën Asti Ipeshkëv i Durrësit dhe Shën Benedikti XI, papë, që na kujtojnë se kur pajtohemi
me një mënyrë jetese që nuk përkon me Ungjillin, do të thotë se më kot e pijmë verën
e tij të re; ajo nuk ka kurrfarë efekti mbi ne, sepse nuk e kemi kuptuar akoma revolucionin
e vërtetë të krishterë.