Një akt që shpreh dashurinë e Papës për Kishën e Kinës: u botua Letra e Benediktit
XVI drejtuar katolikëve kinezë.
(30.06.2007 RV)Një dokument i pritur prej kohe, shenjë e dashurisë dhe e afërsisë
së Papës për bashkësinë katolike të pranishme në Kinë: me këtë frymë u publikua sot
Letra e Benedikti XVI drejtuar ipeshkvijve, meshtarëve, rregulltarëve e besimtarëve
laikë të Kishës katolike në Republikën Popullore të Kinës. Dokumenti papnor, që në
variantin italisht ka 54 faqe e 20 kapituj, përmban orientime për jetën e Kishës dhe
veprimtarinë ungjillëzuese në Kinë, duke iu përgjigjur pyetjeve të shumta që i janë
drejtuar Selisë së Shenjtë vitet e fundit. Në një notë, publikuar nga Salla vatikanase
e Shtypit, nënvizohet se Letra trajton çështje thjeshtë fetare: nuk është dokument
politik, as aktakuzë kundër autoriteteve qeveritare, ndonëse nuk mund t’i injorojë
vështirësitë e njohura që përballon çdo ditë Kisha në Kinë. Nota kujton se këto probleme
u analizuan në Vatikan nga një Komision i posaçëm. Pastaj, më 19 e 20 janarin e kaluar,
Benedikti XVI organizoi një takim, në përfundim të të cilit u përgatit dokumenti i
nënshkruar më 27 majin e kaluar, të Dielën e Rrëshajëve. Me këtë Letër, Ati i Shenjtë
cakton një Ditë lutjeje për Kishën në Kinë, që do të kremtohet më 24 maj.