Papa në lutjen e Engjëllit të Tënzot: Kisha, si Shën Gjon Pagëzuesi, ta dëshmojë të
vërtetën pa kompromise.
(25.06.2007 RV)Si foli për solemnitetin e djeshëm të Shën Gjon Pagëzuesit,
Papa u lut që Kisha, duke ecur në gjurmët e Pararendësit të Krishtit, ta dëshmojë
të vërtetën dhe dashurinë me guxim e pa kompromise. E ndoqën 50 mijë besimtarë, të
pranishëm në Sheshin e Shën Pjetrit. Më 24 qershor Kisha përkujton Lindjen e
Shën Gjon Pagëzuesit: solemnitet aq i rëndësishëm, sa të kremtohet edhe të dielën,
që është Dita e Zotit. Papa shpjegoi arsyen: Jeta e Shën Gjonit, ashtu si ajo e Virgjërës
Mari, iu kushtua krejtësisht Krishtit: “Gjon Pagëzuesi qe pararendësi, ‘zëri’
i dërguar për të kumtuar Krishtin, Fjalën e mishëruar. Prandaj, ta kremtosh ditëlindjen
e tij do të thotë të kremtosh Krishtin, përmbushjen e premtimeve të të gjithë profetëve,
nga të cilët Pagëzuesi qe më i madhi, sepse i thirrur të përgatisë udhën para Mesisë”. Benedikti
XVI kujtoi se të gjithë ungjijtë e fillojnë rrëfimin mbi jetën publike të Jezusit,
duke përshkruar sesi Gjoni e pagëzoi Zotin në lumin Jordan. E edhe libri im “Jezusi
i Nazaretit – nënvizoi Papa – nis me këtë ngjarje, që asokohe pati jehonë të jashtzakonshme.
Njerëzit rendnin nga Jeruzalemi e nga të katër anët e Judesë për të dëgjuar Shën
Gjon Pagëzuesin e për t’u pagëzuar prej tij në lumë, duke rrëfyer mëkatet e tyre.
Gjoni është i famshëm, megjithëse nuk kumton vetveten, por “Qengjin e Hyjit, që shlyen
mëkatin e botës”. Ai është dëshmitari i parë i Jezusit që, duke pasë marrë shenja
nga qielli, e tregon atë si Birin e Hyjit e shpërblyesin e njeriut. Rrëfen, kështu,
të vërtetën, pa kurrfarë frike: “Si profetë i vërtetë, Gjoni bëri dëshmi për
të vërtetën, pa kompromise. Denoncoi shkeljet e urdhërave të Hyjit, edhe kur ata që
nuk i respektonin, ishin njerëz të pushtetshëm. Kështu, kur akuzoi Herodin e Herodiadën
për shkelje kurore, e pagoi me jetë, duke e vulosur me martirizim shërbimin e tij
ndaj Krishtit, që është vetë e Vërteta. T’i lutemi të ndërmjetësojë për ne, së bashku
me Zojën e Bekuar, që edhe në ditët tona Kisha t’i qëndrojë gjithnjë besnike Krishtit
e ta dëshmojë me guxim të vërtetën e tij e dashurinë e tij për të gjithë”. Papa
ia besoj ndërmjetësimit të Shën Gjon Pagëzuesit të gjithë ata që, duke ndjekur shembullin
e tij, përhapin në botë drejtësinë e Mbretërisë së Hyjit. Pas Lutjes së Engjëllit
të Tënzot, Benedikti XVI kujtoi se dje, e diela që i paraprin solemnitetit të Shën
Pjetrit e të Shën Palit, në Itali kremtohej Dita për bamirësinë e Papës e se, në lëmoshët
e djeshme, mblidhej i ashtuquajturi “Oboli” apo ‘Lëmosha e Shën Pjetrit’, që i shërben
Papës për veprimtari bamirëse të veçanta: “Të dashur besimtarë italianë, ju
falënderoj me gjithë zemër për lutjen e për mbështjen solidare, me të cilën merrni
pjesë në veprimtarinë ungjillëzuese e bamirëse të Pasardhësit të Shën Pjetrit në mbarë
botën”. Kujtojmë se veprat që janë realizuar me ‘Obolin e Shën Pjetrit’ janë
të shumta: ndërmjet tyre: “Shtëpia e pritjes Gjon Pali II e veprës Don Orioni” në
lagjen romake ‘Monte Mario’, e pajisur me të gjitha mjetet e nevojshme për të strehuar
falas shtegtarët e sëmurë që shtegtojnë në Qytetin e Amshuar; ‘Qyteti i fëmijëve të
Nazaretit’ në Ruandë, që strehon jetimët e braktisur gjatë luftës civile; ‘Fshati
i jetimëve’ në Kenia; disa spitale në Armeni e në Bosnjë, disa qendra për indianët
e Amerikës Latine, në sa duhen kujtuar edhe ndërhyrjet në ndihmë të të dëmtuarve nga
tërmetet, përmbytjet e thatësirat në Afrikën Subsahariane. Çdo besimtar mund të japë
kontributin e vet sado të vogël, për ‘Lëmoshën e Papës’. Për të ditur më shumë, mund
të hapë kanalin e Vatikanit www. vatikan.va.