(21.06.2007 RV)Kosova dhe Traktati Kushtetues evropian ishin sot në qendër
të vëmendjes në samitin e Bashkimit Evropian, i cili u hap pasdite në Bruksel. Diskutimet
mbi Traktatin parashikohen kaq të vështira, sa mbledhja dyditore ka mundësi të vazhdojë
edhe të shtunën. Në thelb të propozimit të ri të presidencën gjermane të Bashkimit
Evropian, qëndrojnë parimet e traktatit të mëparshëm, por janë bërë disa ndryshime.
Është zhdukur për shembull, fjala “kushtetues”, nuk ka më simbole, flamur dhe himn
të përbashkët, presidenca bëhet dy-vjeçare dhe ka personalitet juridik, përforcohet
politika e jashtme e përbashkët, mbahet sistemi i votimit të dyfishtë, me të cilin
nuk është dakord Polonia. Nga ana tjetër, Britania e Madhe nuk dëshiron që presidenca
të ketë personalitet juridik e sidomos nuk është dakord që Karta evropiane e të drejtave
të jetë e detyrueshme për shtetet. Hollanda kërkon më shumë pushtet për parlamentet
kombëtare, se sa për atë evropian. Pra, gjetja e një konsensusi do të jetë shumë e
vështirë. Duket se projekti kushtetues nuk është kuptuar nga njerëzit, është larg
kërkesave kulturore të vendeve të veçanta, të cilat janë më të lidhura me identitetin
kombëtar.