Ipeshkvijtë evropianë flasin për sfidat e emigracionit
(19.06.2007 RV)Në Minsk të Bjellorusisë përfundoi takimi i sekretarëve të përgjithshëm
të Konferencave Ipeshkvnore të Evropës mbi temën: “Emigracioni: një sfidë për Evropën”.
Është i nevojshëm një impenjim politik në nivelin botëror – theksojnë ipeshkvijtë
– që të përballojë arësyet që sjellin emigracionin si: varfëria, dhuna, padrejtësia,
zhvillimi i pakët, papunësia. Njëkohësisht është i nevojshëm edhe një impenjim kulturor,
që t’i formojë njerëzit për të kuptuar se njeriu është në qendër të çdo veprimtarie,
t’u japë mjetet për të kritikuar ksenofobinë, shpesh e favorizuar nga media, për të
mbështetur një integrim të vërtetë të emigrantëve duke shpëtuar identitetin e tyre.
“Kisha – lexohet në notën përfundimtare – është e shqetësuar nga problemet shoqërore
që lidhen me fenomenin e emigracionit, si klandestiniteti, papunësia, plakja e popullsisë
në vendet nga ku largohen emigrantët, trafiku i personave, shkatërrimi i familjeve,
fëmijët që rriten pa prindër.
Si sot, një vit më parë, më 19 qershor fillonte
punimet në Gjenevë, në kuadrin e Kombeve të Bashkuara, Këshilli për të drejtat
e njeriut. Një organizëm i ri, që zëvendësoi Komisionin për të Drejtat e njeriut,
shpërndarë pas protestave të njëpasnjëshme, që kishin minuar besueshmërinë e tij përsa
i përket neutralitetit, efikasitetit të rezolutave dhe objektivave të mandatit të
tij. Këshilli përbëhet nga përfaqësues të 47 vendeve të OKB-së, të zgjedhur nga Asambleja
e Përgjithshme, e cila tani, pas një viti, përgatitet të vlerësojë punën e kryer.