Papa pret në audiencë ipeshkvijtë e Togos, në Romë për vizitë “Ad Limina”.
(18.06.2007 RV)Sot paradite Benedikti
XVI priti në audiencë grupin e parë të ipeshkvijve të Togos, në vizitë ‘ad Limina’. Togoja,
e pavarur që nga viti 1960, po përpiqet ta kapërcejë përfundimisht periudhën e trazuar
politike, nga e cila sapo ka dalë. Vendi i vogël i Afrikës Perëndimore ka 5 milionë
e gjysëm banorë, 27% e të cilëve janë katolikë, ndërsa 33%, ndjekës të besimeve tradicionale
afrikane. Problemet në vend janë të shumta e të vështira: 36% e popullsisë është analfabete,
përqindjet e vdekjeve në moshë foshnjore janë tepër të larta, ndërsa rritet gjithnjë
numri i të sëmurëve nga Sida, tuberkulozi e malarja. Në këtë atmosferë kryen veprimtarinë
e vet Kisha në vend, siç shprehet edhe imzot Ambroz Gjoliba, ipeshkëv i Sokodesë
e kryetar i ipeshkvijve togolezë: “Kisha e Togos rritet në një atmosferë aktualisht
të qetë, në të cilën të gjithë kërkojnë të rigjejnë paqen e ta vlerësojnë atë. Kisha
ka dhënë një kontribut shumë të çmuar për t’ia siguruar vendit këtë paqe, ka ndihmuar
viktimat e ndeshjeve shoqëroro-politike e vijon t’i qëndrojë shumë pranë refugjatëve
e njerëzve të varfër. Kisha në Togo i ka gjithnjë portat e hapura për njerëzit që
vuajnë. E i ka të hapura edhe për besimtarët e feve të tjera. Unë drejtoj një dioqezë
me shumicë islamike, por kjo nuk i dëmton fare marrëdhëniet e mira ndërmjet palëve.
Të krishterë e myslimanë punojnë së bashku. Bashkëjetesa është paqësore.