(16.06.2007 RV)Në atmosferën e vizitës baritore të Benediktit XVI në Asizi,
po kujtojmë disa nga lutjet e Shën Françeskut, ndërmjet të cilave, krijimin e tij
të famshëm poetik “Këngën e Krijesave”, një nga kryeveprat e letërsisë italiane të
kohës: Uratë para të Kryqëzuarit O Hyj i lartë e i lumnueshëm, ndriçoje
terrinën e zemrës sime. Më jep fe të fortë, shpresë të sigurtë, e përvujtëri
të plotë, Më jep, o Zot, mendje e zemër për të bërë vullnetin tënd Shenjt
e të vërtetë.
O Zot më bëj mjet të paqes sate!
O Zot, më bëj
mjet të paqes sate: Ku ka urrejtje, të çoj dashurinë, ku fyerje ka, pajtimin
ta çoj, ku grindja përçan, të çoj unë bashkim, e ku ka dyshim, fenë shenjte
ta çoj. Ku gërryen gabimi, të çoj të vërtetën, ku ka dëshpërim, unë shpresën
ta çoj, trishtimi ku nxin, të çoj vetëm gëzim, ku ka errësirë, unë dritën ta
çoj. Mësues, më mëso që shumë mos t’ kërkoj, të jem i ngushëlluar, aq sa mund
t’ngushëlloj. T’i kuptoj njerëzit e t’ gjithë t’më kuptojnë, t’i dua të gjithë
e të gjithë t’më dashurojnë. Pse kështu duke dhënë, pa pritur shpërblim më shumë
marr se jap e gjej përdëllim. E duke vdekur, unë frikë s’kam aspak, se ti, Zot,
më ringjall për jetën pacak.
Përshëndetje Zojës. Të falem, o
Zojë, Mbretëreshë Shenjte e Nënë e Shenjtë e Hyjit; Mari, ti virgjër që
u bëre Kishë, Ti e zgjedhura nga Ati qiellor që të shuguroi, së bashku me
Birin tënd të shenjtnueshëm e me Shpirtin Shenjt që jep jetë, Të falem, gurrë
hiri e mirësie, Të falem, pallati i Krishtit, të falem, tabernakulli i Tij, shtëpia
e tij, të falem, Të falem, shërbëtorja e tij, Nëna e tij, të falem! E u
falem virtyteve shenjte të gjitha, Që me hir e dritë të Shpirti Shenjt, ndikohen
ndër zemra, e bëjnë prej të pabesëve, bestarët e Hyjit.