Asizi përgatitet për të pritur Benediktin XVI, që do ta vizitojë të dielën qytetin
françeskan.
(15.06.2007 RV)Në Asizi gjithçka
është gati për ta pritur Benediktin XVI i cili, të dielën e ardhshme do të shkojë
për vizitë baritore në Qytetin e Shën Françeskut e të Shën Kjarës, me rastin e 800-vjetorit
të kthimit të Varfanjakut të Asizit. Pasi të ketë kryesuar Meshën në Sheshin e Bazilikës
së poshtme të Shën Françeskut, ku do të thotë edhe lutjen e Engjëllit të Tënzot, Papa
do të gjunjëzohet pranë varrit të Shenjtit. Shtegtimi baritor do të përfundojë
me vizitën e Atit të Shenjtë në Bazilikën e Shën Marisë së Engjëjve, ku do të lutet
në kapelën e Porciunkolës e pastaj do të takojë të rinjtë në sheshin para bazilikës
madhështore. Ndërmjet atyre që do ta presin Atin e Shenjtë sapo të zbresë
nga helikopteri, do të jetë imzot Domeniko Sorrentino, kryeipeshkëv i Asizit,
Noçerës Umbre e Gualdo Tadinos – që flet për vizitën papnore në mikrofonin e Radios
sonë: Pyetje: - Shkëlqesi, e dimë se Papa do të vizitojë Asizin me rastin
e tetëqindvjetorit të Kthimit të Shën Françeskut: a mund të na thoni diçka për këtë
ngjarje themelore në jetën e Varfanjakut? Përgjigje: - Tetëqind vjet më
parë, Shën Françesku ishte një djalosh i këtij qyteti, që kërkonte gëzimin, lavdinë,
sukseset e kësaj bote. I kërkonte e i gjente, e megjithatë shpirti i tij ishte plot
trishtim. Pastaj takoi Jezu Krishtin e, që nga ai ças Krishti u bë gjithçka për të,
ndërsa ai vetë, nga Françesk Bernardoni, u bë Shën Françesku. Jeta e tij ndryshoi
e, me të, edhe jeta e këtij qyteti. Kush banon në Asizi e ndjen vazhdimisht ndikimin
e mesazhit të Shenjtit, ndonëse kanë kaluar tetëqind vjet. E pikërisht nga kujtimi
i asaj që ngjau para tetëqind vjetëve, lindi Viti i Pendesës, si kujtim i kthimit
të Shenjtit, por edhe si impenjim për ne të gjithë. E pikërisht në kuadrin e këtij
viti vjen Benedikti XVI në Asizi. Pyetje: - Kanë kaluar tetë shekuj e megjithatë
Shën Fraçesku është më aktual se kurrë: pse i tërheq kaq shumë njerëzit profecia e
tij? Përgjigje: - Françesku, siç dihet, sot ndiqet nga shumë njerëz, madje
edhe nga ata që nuk janë të krishterë, por i kanë për zemër fatet e botës, fatet e
njeriut, fatet e historisë, e kjo sepse mesazhet e tij shkojnë në drejtime nga më
të ndryshmet. Zemra e mesazhit të Shenjtit, që e bën kaq aktual, është se ai e jetoi
Ungjillin në atë mënyrë, që i jep kuptim të plotë jetës. E jetoi fjalë për fjalë,
pa bërë asnjë kompromis, e jetoi jo vetëm shpirtërisht, por edhe fizikisht. Françesku
jetoi në varfëri të plotë, duke ia kushtuar gjithçka Zotit, e kështu arriti të zbulojë
edhe kuptimin e gjithësisë, gëzimin e vërtetë françeskan, këngën, lavdërimin e Zotit
e të krijesave të tij. Sot jetojmë në një realitet historik që ka shumë vlera, shumë
sende të bukura, shumë mundësi, sidomos në këndvështrimin ekonomik e teknik, por ka
edhe shumë trishtim, shumë zbrastësi, shumë nevojë për t’i dhënë kuptim jetës. E profecia
e Shenjtit na siguron se kuptimi i plotë i jetës mund të gjindet në Jezu Krishtin
e në Ungjillin e tij. Pyetje: - Ju Shkelqësi, që prej një viti jeni bari
i qytetit Serafik, siç quhet Asizi: a mund të na thoni diçka për realitetin baritor
të kësaj toke? A ndjehet ende fort shpirti i Shën Françeskut? Përgjigje:
- Them se po. Asizi e Françesku janë një trup i vetëm: nuk mund të kuptohet Shën Françesku
pa Asizin e tani, edhe Asizi pa Shën Françeskun, jeta shpirtërore e të cilit ndërroi
pikërisht në këtë qytet. Nuk është e rastit që ai deshi të vdiste këtu. Mund të themi
se gjithçka në këtë qytet flet për të. Ndjehet fuqimisht frymëzimi françeskan në Kishat,
në rrugët e rrugicat, por mbi të gjitha, në bijtë e Shenjtit që banojnë këtu. Ndjehet,
pra, kudo, frymëzimi i tij. Pyetje: - A mund të na thoni diçka për etapat
e vizitës së Papës? Përgjigje: - Disa nga etapat janë ato që të kujtojnë
posaçërisht kthimin e Françeskut: Papa do ta nisë vizitën nga Rivo Torto, ku do të
ulet, e do të bëjë një vizitë të shkurtër në një Kishëz të vogël, dikur shtëpia e
të gërbulurve të Asizit. E kjo, sepse takimi me të gërbulurin e shërbimi që i bëri
atij, janë çasti i parë i kthimit të Shenjtit. E thotë vetë në Testamentin e tij.
Më pas Benedikti XVI do të shkojë në Kishën e Shën Damianit, ku i Kryqëzuari i foli
Shenjtit, do të vizitojë Kishën e Shën Kjarës, ku ruhet Kryqi origjinal i Shën Damianit
e pastaj do të kremtojë Eukaristinë në Bazilikën e Shën Françeskut, ku ruhen reliket
e varfanjakut. Pasdite Papa do të shkojë në Shën Rufino, ku ndodhet ena e ujit të
bekuar, në të cilën u pagëzua Shën Françesku e ku Ati i Shenjtë do të takohet me klerin
e me rregulltarët. Katedralja është vendi i unitetit, vendi i bashkimit. Në këto çaste
papa dëshiron që Asizi ta ndjejë veten sa më të bashkuar. Janë këto notat kryesore
të ‘motu proprio’ me të cilën Ati i Shenjtë unifikoi veprimtarinë baritore të Asizit
e të Kishës asiziane. Më në fund Papa do të shkojë në bazilikën e Shën Marisë së Engjëjve,
dmth në Porciunkola, për t’ua dorëzuar përsëri të rinjve mesazhin e Shën Françeskut.
Françesku është shenjt që mbeti i ri, në moshë e në shenjtëri, e kështu do t’ua dorëzojë
Papa të rinjve.