Në audiencën e përgjithshme, Benedikti XVI nënvizoi: në historinë e Kishës të kërkohen
dashuria dhe veprat e Zotit, jo shkandujt e sensacionalizmat.
(13.06.2007 RV)Papa i porosit besimtarët
të shikojnë veprat e mëdha të Zotit në histori e ta duan Kishën, pa kërkuar me çdo
kusht shkandujt e ngjarjet e bujshme. Ky është mesazhi kryesor i audiencës së 21-të
të përgjithshme, mbajtur sot paradite nga Benedikti XVI në Sheshin e Shën Pjetrit,
në praninë e 20 mijë shtegtarëve. Papa ia kushtoi katekizmin Euzebit të Çezaresë,
ipeshkëv e historian i parë i krishtërimit. Ndërmjet shumë përshëndetjeve, në përfundim
të audiencës, Papa kujtoi posaçërisht vullnetarët e Shoqatës Italiane të Dhuruesve
të Gjakut (AVIS), që kremton 80-vjetorin e themelimit. Që ka njerëz, të cilët
e ndjekin veprimtarinë e Kishës duke kërkuar gabimet, duke përhapur shkandullin ose
duke u interesuar thjeshtë për ngjarje të bujshme, të shtyrë nga kureshtja ose nga
paragjykimet – ky është një fakt i pamohueshëm. Por një i krishterë i vërtetë nuk
duhet ta shikojë Kishën e vet me këtë sy, përkundrazi, feja duhet ta ndihmojë t’a
hapë shpirtin, për të njohur misterin e për të kërkuar, në historinë e Kishës, shenjat
e dashurisë së Zotit, e në historinë e njerëzve, veprat e Tij të shëlbimit. Këtë nënvizoi
Benedikti XVI në katekizmin e sotëm, duke i dalluar mirë këto dy qëndrime, i frymëzuar
nga njëri prej ipeshkvijve të mëdhenj të epokës së parë të krishterë, Euzebi i Çezaresë,
i cili 1700 vjet më parë përshkroi veprimet e atyre që, si “ujqër të uritur” iu
sulën pa mëshirë grigjës së Krishtit, por edhe të atyre që, brez pas brezi, qenë
kasnecë të Fjalës Hyjnore me fjalë e me shkrime. Teolog, ekzegjet, dijetar i thellë,
Euzebi vendosi të përmblidhte tre shekuj të historisë së Kishës, shekuj persekutimi
e martirizimi, duke u ndaluar edhe në evolucionin doktrinor të vitit 325, që nisi
me Koncilin e famshëm të Nikesë, në të cilin mori pjesë personalisht dhe dha një kontribut
të çmuar, si autor i asaj ‘Besojme’, që e përsërisin edhe sot e kësaj dite gjithë
të krishterët. E pikërisht në saje të dhjetë librave të ‘Historisë Kishtare’ shkruar
nga ipeshkvi i Çezaresë – shpjegoi Papa – shumë ngjarje, personazhe e vepra letrare
të Kishës së lashtë shpëtuan nga rreziku i zhdukjes e i harrimit. Në vëllimet tij
përmblidhen jetë shenjtorësh e martirësh, flitet për heretikë e apologjetë, por gjithnjë
duke i shikuar personazhet e ngjarjet me syrin e mëshirës e të mirësisë hyjnore.
Nga vepra madhore e Euzebit, histori kristocentrike, në të cilën zbulohet pak nga
pak misteri i dashurisë së Zotit për njerëzit dhe prania e tij në histori - tha Papa
– buron një pyetje, që u drejtohet besimtarëve të çdo kohe: “Ai – theksoi
Ati i Shenjtë– na drejton edhe ne pyetjen: ç’ qëndrim mbajmë ndaj ngjarjeve të
Kishës? Mbajmë qëndrimin e njeriut që shtyhet nga kureshtja, në kërkim të bujës e
të shkandullit me çdo kusht? Apo qëndrimin plot dashuri të njeriut, që ia hap zemrën
misterit, që e di, përmes fesë, se në historinë e Kishës mund të kërkojë e të gjejë
shenjat e dashurisë së Hyjit dhe veprat e mëdha të shëlbimit të kryera prej tij? Në
se është ky qëndrimi ynë, nuk mund të mos nxitemi për një përgjigje sa më koherente
e bujare, për një dëshmi sa më kristiane jete, për t’ua lënë trashëgim gjurmët e dashurisë
së Zotit edhe brezave të ardhshëm.” “Në histori ka ngjarje të dukshme e të
fshehura – tha në përfundim Benedikti XVI, duke cituar studiuesin e Patristikës, kardinalin
Zhan Danielù, sipas të cilit misteri s’është tjetër, veç veprat e Zotit, që krijojnë
në kohë realitetin e vërtetë, të fshehur pas pamjeve të jashtme: “Pas shumë
shekujve, Euzebi i Çezaresë i fton edhe sot besimtarët, na fton ne, të mahnitemi,
të kundrojmë, në histori, veprat e mëdha të Zotit për shëlbimin njerëzve. E, me të
njëjtën energji, na fton të bëjmë kthesë në jetë. Në të vërtetë, përballë një Zoti
që na deshi kaq shumë, nuk mund të rrijmë duarkryq. Vetë natyra e dashurisë të shtyn
t’i përngjash me tërë jetën njeriut të dashur. Të bëjmë, pra, gjithçka mundemi për
të lënë në jetën tonë një gjurmë të tejdukshme të dashurisë së Zotit”. Në përfundim
të katekizmit në gjuhë të ndryshme, Benedikti XVI përshëndeti budistët, anëtarë të
“Risso Kosei-Kai” si dhe dhuruesit italianë të gjakut, duke i nxitur të vijojnë shërbimin
e tyre të çmuar ndaj të afërmit e ndaj vetë vlerave të jetës. Më pas, duke iu drejtuar
anëtarëve të Grupit për Kërkime Shkencore e Informacion Shoqëroro-Fetar, Papa vlerësoi
lart punën e tyre, lidhur me një temë delikate: “Ju përgëzoj për impenjimin
tuaj kishtar, i cili ka për qëllim t’i sqarojë të krishterët për rreziqet lidhur me
përhapjen e sekteve e të lëvizjeve të tjera të kësaj natyre”.E së fundi, Papa
përshëndeti të rinjtë, duke kujtuar se për disa kanë nisur pushimet, në sa disa të
tjerë janë para provimeve. Ju ndihmoftë Zoti – i uroi Ati i Shenjtë – që ta jetoni
qetësisht këtë periudhë e të provoni mbrojtjen e Tij”.