(13.06.2007 RV)Gjithnjë e më e
ndezur gjendja në Territoret Palestineze. Krahu i armatosur i organizatës islamike
Hamas i ka dhënë një ultimatum tjetër milicive të partisë Al Fatah, që të dorëzojnë
armët. Nga ana e tij, presidenti palestinez Abu Mazen, i partisë Al Fatah, ka bërë
thirrje për armëpushim, duke kërcënuar se partia e tij do të tërhiqet nga qeveria.
Situata në Rripin e Gazës i ngjan gjithnjë e më shumë një lufte civile. Ndeshjet e
këtyre ditëve kanë shkaktuar rreth 50 të vdekur. Militantë të Hamasit kanë hedhur
në erë Shtabin e Përgjithshëm të Sigurisë së Al Fatahut në Khan Junis në jug të Rripit
të Gazës. 40 policë janë arratisur për në Egjipt. Hamasi ka deklaruar se kontrollon
krejt Gazën, përveç kazermave, besnike ndaj Al Fatahut. Italianët e mbetur të mbërthyer
në darën e luftimeve në Gazë arritën të dalin sot jashtë zonës, në sajë të impenjimit
të Kryqit të Kuq dhe të Ministrisë së Jashtme italiane. Disa qindra palestinezë mbushën
sheshet e Gazës sot paradite për të kërkuar fundin e dhunës. Bashkimi Evropian është
treguar i gatshëm të mbështesë idenë izraelite për dërgimin e një force ndërkombëtare
në vend. A ekziston rreziku që gjendja jashtë çdo kontrolli në Rripin e Gazës
të shtrihet edhe në Çisjordani? Përgjigjet në mikrofonin tonë, atë Pierbatista Picabala,
rojtar i Tokës Shenjte: Akoma jo. Unë mendoj se Çisjordania ka një situatë,
edhe shoqërore, shumë të ndryshme nga ajo e Gazës. Për momentin, rreziku është akoma
larg. E rëndësishme është që të punohet për ta qetësuar situatën – megjithëse në Gazë
duket vonë – që të mos ketë koka të nxehta për t’i sjellë këndej këto tensione. Kush
e dëshiron luftën civile? Sigurisht bota arabe, bota tribale. Kam përshtypjen
se krerët e mëdhenj e kanë humbur kontrollin mbi territor, por ka edhe celula që kanë
hyrë nga jashtë. Françeskanët e Tokës Shenjtë kanë bërë thirrje për paqe.
E di që nganjëherë të flasësh në këtë mënyrë është retorike, por është e rëndësishme
që të gjithë të ndjehen afër me çka po ndodh këtu. Është e rëndësishme që të ndërhyhet
e të bëhen të gjitha presionet e nevojshme që kjo masakër të përfundojë sa më shpejt.
Zv.kryeministri izraelit, Shimon Peres u zgjodh sot president i shtetit të
Izraelit. E votuan 86 deputetë nga 120 të mundshmit në parlament.
Ndalim qarkullimi
në Samarra, në veri të Irakut, pas atentatit që sot paradite shkatërroi dy minaretë
e xhamisë shiite të qytetit. 30 deputetët e liderit Moktada al Sadr kanë braktisur
parlamentin në shenjë proteste. Një atentat i ngjashëm në shkurt të vitit 2006 kundër
xhamisë qe shkak për fillimin e një fushate të përgjakshme dhune ndërmjet shiitëve
dhe sunitëve. Shtëpia e Bardhë dënoi atentantin, i cili, sipas amerikanëve, është
vepër e Al Kaidës. Po sot, ushtria amerikane në Irak deklaroi se ka vrarë kreun e
organizatës terroriste në Mosul.