Mesazh i Benediktit XVI për njëqindvjetorin e gazetarit italian Odoardo Fokerini,
që shpëtoi më se njëqind hebrenj nga Shoah.
(08.06.2007 RV)“Figurë e paharrueshme e bashkëshortit të krishterë, shembulli
virtuoz i të cilit vijon t’i flasë Kishës së sotme”. Me këto fjalë e kujtoi Benedikti
XVI italianin Odoardo Fokerini, njëri prej heronjve antinazistë të cilët gjatë Luftës
II Botërore e shkrinë e nganjëherë edhe e humbën jetën, për t’i shpëtuar hebrenjtë
nga shfarosja në masë. Mesazhi i Papës, nënshkruar nga kardinali Bertone, i drejtohet
dioqezës modeneze të Karpit, që kremtoi njëqindvjetorin e lindjes së Fokerinit, procesi
dioqezan për lumnimin e të cilit përfundoi në vitin 1998, kur aktet i kaluan Kongregatës
për Çështjet e Shenjtorëve. Bashkëshort, baba i shtatë fëmijëve, gazetar, por
sidomos trim, në një kohë kur mbrojtja e idealeve të kushtonte jetën, Odoardo Fokerini,
me ndihmën e ipeshkvnisë modeneze, guxoi, nën hundën e nazistëve, të organizonte kalimin
e hebrenjve drejt Zvicrës e ta bënte edhe shtëpinë e tij vendstrehimi për njerëz që
rrezikoheshin të zhdukeshin. Si u arrestua e u transferua nga një kamp përqendrimi
në tjetrin, vdiq në kampin nazist të Hersbrukut natën e Krishtlindjes të vitit 1944.
Ishte vetëm 37 vjeç. Prandaj në mesazhin për njëqindvjetorin e lindjes së tij , Benedikti
XVI uron që ky rast të kontribuojë për kujtimin e dëshmisë së ndritshme të këtij laiku
fisnik që, duke u përpjekur të ecë në gjurmët e Krishtit, nuk kurseu as jetën për
shpëtimin e vëllezërve.