(03.06.2007 RV)Sot Kisha katolike kremtoi solemnitetin e të Shenjtnueshmes
Trini. U përkujtuan edhe Shën Karl Lvanga me shokë, martirë të Ugandës dhe Shën Klotilda,
mbretëreshë e frankëve. Nesër, e hënë, do të kremtohet festa e Shën Françesk
Karaçiolos, meshtar, themelues i Klerikëve të Vegjël Rregulltarë dhe e Shën Kuirinit,
martir. Na kujtojnë se njeriu i drejtë i jep lumni Hyjit me bindjen se feja nuk është
prona jonë. Na u dorëzua që të kujdesemi për të, ashtu si vreshti vreshtarëve. Kemi
përgjegjësi për lulëzimin e vreshtit, por nuk jemi i zoti. Liturgjia e së martes
na kujton se secili nga ne është i thirrur të japë kontributin e tij për ndërtimin
e një realiteti më të mirë, duke i ndihmuar për këtë edhe autoritetet civile. Është
festa e Shën Bonifacit, ipeshkëv e martir, apostull i Gjermanisë. Në bisedën
që bëjnë saduçejtë e farizenjtë me Jezusin, gjejmë gjithnjë të vërteta të mëdha e
sot, të vërtetën se Zoti është përherë i pranishëm në jetën tonë jo si gjykatës, as
si padron, por si Atë që kujdeset gjithnjë për të bijtë. Këtë na kujton liturgjia
e festës së Shën Norbertit, ipeshkëv i Magdenburgut, themelues i Kanonikëve Rregulltarë
Premostratens; e Shenjtorëve Artemi e Paolina, martirë dhe e Shën Klaudit, abat e
ipeshkëv, që do të përkujtohen të mërkurën. Të enjten Kisha do të kremtojë
Solemnitetin e Korpit e të Gjakut të Krishtit, që në shumicën e vende të botës
shtyhet për të dielën e ardhshme. Solemniteti na nxit të reflektojmë se dashuria për
Zotin nuk mund të ndahet nga dashuria për të afërmin: janë dy faqe të së njëjtes medalje
e stil i një jete, që e ka themelin e vet tek Krishti i vdekur e i ngjallur, që na
la si trashëgim dashurie, Korpin e Gjakun e vet. Shën Medardi, ipeshkëv i Nojonit,
që Kisha do ta festojë të premten, na kujton se feja dhe tradita janë dy çelësat,
pa të cilët nuk mund ta hapim e ta lexojmë mesazhin ungjillor. Jezusi është njeri
i ri, por që ecën në gjurmët e traditës së hebrenjve, bijve të besëlidhjes së parë.
Nuk ka rëndësi sasia e dhuratave, por cilësia e tyre: në se japim atë që nuk na duhet,
ç’shpërblim meritojmë? Por në se dhurojmë me gjithë zemër atë që i duhet tjetrit,
atëherë jeta jonë fiton vërtetë kuptim të ri. Këtë na kujton festa eShën Efremit,
diakon e doktor i Kishës, e Shën Primos (Prelës) dhe e Shën Feliçianit, martirë, që
do të kremtohen të shtunën.