(01.06.07 RV)Pak ditë para takimit
të G8-ës në Hailigendam të Gjermanisë, ashpërsohet tensioni ndërmjet Rusisë dhe SHBA-ve
për projektin e mbrojtjes kundër raketave, që Uashingtoni ka ndërmend të fillojë në
Poloni e në Republikën Çeke. Presidenti rus, Vladimir Putin akuzon amerikanët se kanë
filluar sërish garën e armatimeve. Përse Moska kundërshton vendosjen e raketave në
dy vendet e Evropës Qendrore? Pyetëm Fulvio Skalionen, zv.drejtor i revistës së njohur
kishtare italiane “Familja e krishterë” dhe ekspert i çështjeve që përfshijnë zonën
e ish-Bashkimit Sovjetik: Ky projekt amerikan nuk është i qartë: Nuk kuptohet
se kë duhet të godasin me këto raketa Polonia dhe Republika Çeke. SHBA-të flasin për
mbrojtje kundër “Shteteve terroriste”, a thua se Irani apo Koreja e Veriut po përgatiten
të sulmojnë Poloninë, për shembull. Është e qartë së nëse objektivi nuk është ky –
e s’mund të jetë ky – atëherë synimi i vetëm është mbrojtja e vendeve ish-sovjetike
nga kthimi i mundshëm i ekspansionizmit rus. Kjo natyrisht i acaron rusët, të cilët
nuk më duket se janë gati të pushtojnë Poloninë apo vende të tjera. Amerikanët
kanë dalë nga Traktati kundër raketave balistike. Rusia, e cila kohët e fundit ka
bërë një provë me këto raketa, kërcënon se nuk do ta respektojë Traktatin mbi armët
konvencionale në Evropë. Po kthehet lufta e ftohtë? Kuadri politik global që
karakterizonte luftën e ftohtë është zhdukur përgjithmonë. Atëherë kishim dy blloqe
të kundërta e kjo kundërvënie i mbante të bashkuara të dyja frontet. Sot, kanë hyrë
në skenë aktorë të tjerë: Kina, India, Rusia, por edhe Irani, Pakistani, Arabia Saudite,
Venezuela. Janë të gjitha vende, të cilave nuk mund t’u imponosh asgjë, sidomos kur
preteksti është thjesht kundërvënia e blloqeve, që nuk ekzistojnë më.