(31.05.07 RV)SHBA-të janë akoma të gatshme të fillojnë dialogun me Iranin,
përveç diskutimeve për Irakun, me kusht që Teherani të vendosë pezullimin e programit
të tij bërthamor. Deklaratën e bëri në Vjenë, sekretarja amerikane e shtetit, Kondolica
Rajs.
Parlamenti turk miratoi sot zgjedhjen e drejtpërdrejtë të presidentit
të Republikës, duke i hapur kështu rrugën reformës së Kushtetutës. Kanë votuar
pro dy të tretat e asamblesë. Sipas ligjit, presidenti aktual Ahmet Nexhdet Sezer
nuk mund të vendosë veton kundër këtij vendimi, por mund të thërrasë popullsinë të
shprehet me referendum brenda 4 muajve. Gjithsesi, ky parlament do të ndryshohet më
22 korrik, kur do të bëhen zgjedhjet e parakohshme.
Duhani është i dyti
në listën e shkaqeve që çojnë drejt vdekjes në të gjithë botën. Gjysma e personave
që sot pijnë duhan rregullisht mund ta humbin jetën për këtë arësye, ashtu si edhe
qindra mijëra persona të tjerë që qëndrojnë pasivisht në vende ku pihet duhan. Organizata
Botërore e Shëndetësisë denoncon këtë realitet në Ditën e sotme botërore pa duhan,
e cila sivjet ka për temë “Ambiente pa tym”. Personat që pijnë duhan janë gati 1 miliard
në të gjithë botën, duke filluar nga mosha 15 vjeç. 35% e tyre jetojnë në vendet e
zhvilluara e 250 milion prej tyre janë gra. Vitet e fundit, shkencëtarët që janë marrë
me problemin, kanë nxjerrë në pah se edhe mospirja e duhanit, por qëndrimi në lokale
ku pihet duhan, shkakton dëme në organizëm, me pasoja të rëndësishme për lindjen e
tumoreve dhe të sëmundjeve të zemrës.