Jehona e fjalimit të Papës drejtuar Konferencës ipeshkvnore italiane.
(25.05.2007 RV)Në Itali ndjehet fort jehona e fjalimit që mbajti dje Benedikti
XVI para ipeshkvijve italianë, mbledhur në Romë në asamblenë e 57-të plenare të Konferencës
së tyre ipeshkvnore. Benedikti XVI shprehu besimin e tij të plotë se “Feja katolike
dhe prania e Kishës mbeten faktor i madh bashkues i Kombit të dashur italian si dhe
rezervuar energjish morale për ardhmërinë e tij”.Vetë realiteti i Italisë e dëshmon
vërtetësinë e këtij pohimi të Atit të Shenjtë, që u jep zemër besimtarëve katolikë
t’i ftojnë edhe bashkatdhetarët që janë larg Kishës, për ta njohur më nga afër atë,
duke lexuar edhe mjetet katolike të komunikmit, e jo vetëm disa gazeta që u kundërvihen
katolikëve e, sidomos, duke dëgjuar zërin e Kishës, të Papës e të ipeshkvijve, që
kanë karizmën t’i prijnë popullit të Zotit e t’i bashkojnë të gjitha shtresat e ndryshme
të popullsisë italiane në një familje të vetme.