Benedikti XVI, në takimin me ipeshkvijtë italianë, foli për rolin bashkues të fesë,
për familjen, thirrjet meshtarake, luftën kundër varfërisë dhe dialogun ndërfetar.
(24.05.2007 RV)“Një forcë e gjallë,
e rrënjosur në shoqëri, e impenjuar për të promovuar vlerat themelore, duke u nisur
nga familja e nga mbështetja e të varfërve”: Kështu i përshkroi sot Benedikti XVI
karakteristikat e Kishës italiane, duke pritur në audiencë në Vatikan, prelatët e
Konferencës Episkopale të Italisë, me rastin e Asamblesë së 57-të përgjithshme. Në
fillim Papa falënderoi kardinalin Kamilo Ruini dhe kryeipeshkvin Angjelo Banjasko,
i cili e zëvendësoi në detyrën e kryetarit të episkopatit italian në marsin e kaluar. Më
pas Papa theksoi:“Feja katolike dhe prania e Kishës mbeten faktor i madh bashkues
i këtij Kombi të dashur si dhe rezervuar energjish morale për ardhmërinë e tij”. Pastaj
duke vërejtur se edhe në Itali ndjehet fuqimisht pesha e një kulture të prekur nga
relativizmi moral, Benedikti XVI kërkoi nga ipeshkvijtë fuqizimin e edukimit të krishterë,
përmes një katekizmi më të pasur në përmbajtje dhe venien e Zotit në qendër të jetës
së bashkësisë. Theksoi edhe rëndësinë e kujdesit për thirrjet e reja meshtarake e
për familjet, duke u kujtuar prelatëve përgjegjësitë që kanë jo vetëm para Kishës,
por edhe para mbarë Kombit. Ati i Shenjtë shprehu kënaqësinë për suksesin e ‘Ditës
kushtuar familjes’ që u kremtua si një festë e madhe popullore, gjë që kontribuoi
për ta bërë të dukshëm rolin e kuptimin e familjes, në një shoqëri që gënjen veten
se favorizon lumturinë e njerëzve, duke ngulur këmbë në mënyrë të njëanshme tek liria
e individit.Në vijim Papa i porositi ipeshkvijtë të tregohen të vëmendshëm në shërbimin
e përditshëm ndaj të varfërve, në një kohë që vuan nga varfëri të vjetra e të reja,
të dukshme të fshehura. Pastaj, duke kujtuar Kongresin e Veronës, i porositi ipeshkvijtë
t’ua kumtojnë Krishtin jo vetëm italianëve, por edhe bijve të popujve të tjerë, që
vijnë të jetojnë e të punojnë në Itali.