(22.05.07 RV)Zgjati më pak se një orë armëpushimi i shpallur sot nga grupi
islamik Fatah al-Islam në Liban, i cili duhej të lejonte transferimin e të plagosurve
nga kampi i refugjatëve palestinezë Nahr al-Bared. Vetëm 40 minuta edhe për të çuar
ndihmat humanitare për 30 mijë refugjatët. Luftimet ndërmjet grupit dhe ushtrisë libaneze
filluan kur shumë civilë ishin akoma të mbledhur përreth karvanit të Kombeve të Bashkuara.
Ushtria libaneze nuk ka qëlluar kundër kampit. Gjatë luftimeve që zgjasin prej tri
ditësh, janë vrarë 77 vetë. Nga ana tjetër, lëvizja islamike palestineze Fatah ka
kërcënuar se do të ketë revolta në të gjitha kampet palestineze në Liban.
Sot,
përfaqësuesi i lartë evropian për politikën e jashtme dhe sigurinë, Havier Solana
ndodhej në Jeruzalem, etapa e parë e turneut të tij në Lindjen e Mesme, që do ta çojë
edhe në Liban, Egjipt dhe në Territoret Palestineze. Të ndalojë menjëherë dhuna në
të gjithë Lindjen e Mesme – kërkoi sot Solana – pasi e vetmja zgjidhje për paqen është
dialogu politik. Nga Bejruti, ku shkoi më pas, Solana i dha mbështetjen e vet kryeministrit
libanez, Fuad Siniora.
Një lajm i mirë nga Iraku. U lirua meshtari
kalde, at Navatz Hana, i cili mundi të përqafojë sivëllezërit e tij mbrëmë vonë. Por
në terren vazhdon dhuna. Shpërthimi i një bombe në tregun e Bagdadit ka shkaktuar
vdekjen e 25 personave, shumë prej të cilave gra e fëmijë. Ndërkaq, presidenti amerikan
Bush ka deklaruar se muaji shtator do të jetë një muaj i rëndësishëm për të vlerësuar
përparimet që janë bërë në Irak.
Liderët fetarë të SHBA-ve i kanë
bërë thirrje presidentit Bush që të marrë masa konkrete kundër ngrohjes globale, të
cilën e quajnë "çështje morale dhe shpirtërore". Në letrën e publikuar sot, më shumë
se 20 udhëheqës fetarë i kërkojnë Bushit të bëjë më shumë për të kufizuar emisionin
e gazrave që ndotin ambientin dhe të investojë në burimet alternative energjitike.
Letra botohet në momentin kur shkencëtarët amerikanë kanë vënë në dukje se emisioni
i gazrave të dëmshme në atmosferë është rritur 3 herë në krahasim me vitet ‘90.