Në emër të Zotit, Benedikti XVI kërkon paqe për Lindjen e Mesme e, në Ditën botërore
të komunikimeve shoqërore, i bën thirrje industrisë së mediave t’i mbrojë fëmijët.
(21.05.2007 RV)Dje, në kremtimin e Mbretëreshës Qiellore, Papa u lut përsëri
për paqen në Tokën Shenjte. Duke pasur parasysh se dje kremtohej Dita e 41-të botërore
e komunikimeve shoqërore, i drejtoi një thirrje të fuqishme industrisë së mjeteve
të komunikimit për mbrojtjen e së mirës së përbashkët. Së fundi kujtoi edhe shtegtimin
e tij apostolik në Brazil si dhe ngjarjet e rëndësishme kishtare të këtij shtegtimi. “Ndeshjet
ndërmjet grupeve palestineze në Rripin e Gazës dhe flakja e raketave kundër banorëve
të qyteteve fqinje izraelite, të cilave Izraeli iu përgjigj me armë, po e keqësojnë
më tej situatën e përgjakshme, tronditëse” – kështu e komentoi Benedikti XVI zhvillimin
tragjik të ngjarjeve luftarake në Lindjen e Mesme: “Edhe një herë, në emër të
Zotit, lutem t’i jepet fund kësaj dhune tragjike, ndërsa popullsive të vuajtura palestineze
e izraelite dëshëroj t’u shpreh afërsinë time solidare e t’i siguroj se i kujtoj në
lutje. U bëj thirrje të gjitha autoriteteve palestinese që, duke e ndjerë thellë përgjegjësinë
e tyre, të rifillojnë dialogun dhe të ecin me vendosmëri në rrugën e mirëkuptimit,
duke neutralizuar përkrahësit e dhunës. E ftoj qeverinë izraelite të jetë e matur
dhe nxis bashkësinë ndërkombëtare të shumfishojë përpjekjet në favor të rifillimit
të bisedimeve. Zoti i nxitët e i ndihomoftë veprimtarët e paqes”. Më pas
mendimi i Papës shkoi tek fëmijët, që ishin në qendër të vemendjes në Ditën botërore
të komunikimeve shoqërore, kushtuar temës: “Fëmijët dhe mjetet e komunikimit: sfidë
për edukimin”. Mjetet e komunikimit – nënvizoi Ati i Shenjtë – konkurojnë shkollën,
Kishën, e madje edhe familjen. Prandaj është themelore që fëmijët – këshilloi Benedikti
XVI – të përgatiten në mënyrë të përshtatshme për përdorimin korrekt të mediave. “Prindërit,
mësuesit dha bashkësia kishtare duhet të bashkëpunojnë për t’i edukuar fëmijët e të
rinjtë, që të dinë të zgjedhin e të mbajnë qëndrim të pjekur kritik, duke u kultivuar
shijen për të pranuar atë që është estetikisht e moralisht e vlefshme”. Por
edhe mediat – tha me qortim Papa - duhet të japin kontributin e tyre për të mbrojtur
dinjitetin themelor të njeriut, vlerën e vërtetë të martesës dhe të jetës familjare,
arritjet më pozitive të qytetërimit. “Programet që mburrin dhunën e sjelljet
anti-shoqërore ose vulgarizojnë seksualitetin njerëzor, janë të papranueshme, aq më
tepër kur u propozohen të miturve” Këtë Papa e theksoi me forcë e më pas i
nxiti të gjithë ata që vendosin të punojnë në mjetet e komunikimit. “U përsëris
drejtuesve të industrisë së mediave dhe punonjësve të komunikimit shoqëror thirrjen
t’i formojnë e t’i inkurajojnë prodhuesit për të mbrojtur të mirën e përbashkët, të
vërtetën, dinjitetin njerëzor dhe për të respektuar nevojat e familjes”. Papa
kujtoi edhe shtegtimin e tij në Brazil dhe e falënderoi përsëri Zotin për ngjarjet
e mëdha kishtare të këtij udhëtimi: shenjtërimin e të Lumit të parë brazilian, Vëlla
Antonit të Shën Anës Galvao dhe hapjen e Konferencës së përgjithshme të episkopatit
latinoamerikan e karaibik, që vijon në Aparesida, për të cilën Papa u kërkoi besimtarëve
të mos e ndërpresin lutjen. Së fundi Benedikti XVI kujtoi festën e të Shëlbuemit,
që u kremtua të enjten e kaluar, por në shumë vende, u shty për dje - dhe iu lut Virgjërës
Mari të nxjerrë për mbarë Kishën hirin e Rrëshajve të reja. Ndërmjet mijëra besimtarëve,
në Sheshin e Shën Pjetrit ishte edhe kryetari i Konferencës ipeshkvnore italiane,
imzot Angjelo Banjasko, i cili shoqëronte më se njëmijë fëmijë që do të krezmohen
në dioqezën e tij të Gjenovës e, me këtë grup – siç e kujtoi vetë Papa – ishte edhe
kardinali Tarçizio Bertone, ish-kryeipeshkëv i qytetit italian.