Kosova, dosja e parë e Kushnerit - Asgjë e re nga takimi BE-Rusi
(18.05.07 RV)Një qeveri më e zhdërvjellët, me 15 ministra në vend të 30-tëve
të ekzekutivit të mëparshëm Vilpë, e përbërë nga 7 gra dhe 8 burra. Kjo është qeveria
e re franceze e kryeministrit Fransua Fijon, mbledhur sot pasdite për herë të parë
në Këshillin e Ministrave. Ministër i jashtëm, ish shefi i UNMIK-ut në Kosovë, në
vitet 1999-2001, Bernard Kushner, i cili ka tashmë mbi tavolinë dosjet më urgjente
që do të diskutohen edhe në mbledhjen e Bashkimit Evropian në qershor. Fjala është
për të ardhmen e Kosovës, krizën bërthamore iraniane dhe gjendjen në Darfur. Ndërkaq,
lideri socialist francez Fransua Holland e ka përjashtuar themeluesin e “Mjekëve pa
kufi” nga partia, pasi merr pjesë në një qeveri të djathtë. Fjalë të hidhura edhe
për mikun e 30 vjetëve, Zhan Pierr Zhuì, emëruar sekretar i Shtetit për punët evropiane.
Zhuì nuk është anëtar i partisë socialiste, por konsiderohet simpatizant, pavarësisht
se ka filluar të bashkëpunojë me presidentin aktual Nikolas Sarkozì që nga viti 2004.
Asgjë
e re nga Samara ku u zhvillua takimi Bashkim Evropian-Rusi. Problemet që e kanë ngritur
tensionin ndërmjet Brukselit e Moskës mbeten të pazgjidhura. Nuk u nënshkrua asnjë
marrëveshje, për shkak të vetos së Polonisë, kundër së cilës Rusia ka vendosur embargon
e eksportimit të mishit, me akuzën se kontrollet e cilësisë nuk janë në nivelin e
duhur. Liderët evropianë, kancelarja gjermane Angela Merkel dhe presidenti i Komisionit
Evropian, Barroso theksuan se për Brukselin janë të rëndësishme çështje si mbrojtja
e të drejtave të njeriut, qëndrimi rus ndaj Letonisë dhe Estonisë si edhe ndaj Kosovës,
por ndryshimet në pikëpamje mbetën. Qeveria e presidentit rus Putin ndaloi rrugës
liderët e opozitës, të cilët ishin nisur për të marrë pjesë në një manifestim proteste
në Samara. Mes tyre, edhe kampioni botëror i shahut, Kasparov.