(09.05.07 RV)Zv.presidenti amerikan Dik Çenei vizitoi papritur Bagdadin, ku
qëndroi për bisedime me kryeministrin irakian Nuri al Maliki dhe liderë të tjerë.
Vizita e paparalajmëruar shënon fillimin e turneut të Çeneit në Lindjen e Mesme. Ai
synon të bindë shumicën sunite të fqinjëve të Irakut që të mbështesin ofensivën katër
mujore amerikane kundër kryengritësve në Irak. Ndërkaq, ka arritur në 20 të vdekur
e 70 të plagosur bilanci i shpërthimit të kamionit bombë në Arbil, kryeqyteti i Kurdistanit
irakian. Atentati kamikaze ndodhi në mëngjes, para ministrisë lokale të brendshme.
Polemika e tmerr në Afganistan, ku luftimet ndërmjet talebanëve
dhe ushtarëve të koalicionit ndërkombëtar kanë shkaktuar 21 viktima civile në provincën
e Helmandit. Guvernatori lokal akuzon bombardimet e NATO-s e dje, ushtarët amerikanë
u akuzuan edhe për vrasjen e 19 viktimave të tjera civile në provincën e Nangarharit.
Ndërkaq, Senati i Kabulit ka miratuar një mocion që mbështet hapjen e bisedimeve me
talebanët.
Vazhdojnë problemet në periferitë e qyteteve kryesore franceze,
në shenjë proteste ndaj zgjedhjes së Nikolas Sarkozì si president i Francës. Në Paris,
150 manifestues u përpoqën të bllokonin rrugët që çojnë në sheshin e Bastijës. Në
Lion 400 vetë u ndeshën me policinë e në Vilërban iu vu zjarri selisë së partisë së
Sarkozìsë. Zhak Shirak do t’ia kalojë detyrën Nikolas Sarkozìsë më 16 maj.